आजराती आकाशमा पुष्पचन्द्र देखिने, अमेरिकाभर रोमाञ्चक दृश्य हेर्न सकिने
प्रकाशित मिति : जेष्ठ १, २०७९ आईतबार
आजराती आकाशमा पुष्पचन्द्र देखिने भएको छ । पूर्ण चन्द्रग्रहणका क्रममा उक्त रोमाञ्चक दृश्य हेर्न सकिने भएको छ ।
मे महिनाको पूर्णचन्द्रलाई पुष्पचन्द्रका रुपमा समेत चिनिन्छ । जुन आइतबार राती र सोमबार विहान आकाशमा फक्रिने भएको छ ।
आइतबार मध्यराती लगत्तै सोमबार विहान न्युयोर्क समय अनुशार १२ बजेर १५ मिनेटमा उत्कर्षमा उक्त दृश्य हेर्न सकिनेछ । अमेरिकाको पूर्वी क्षेत्रमा रहेकाहरुले यो सुन्दर दृश्य आइतबार राती साढे ११ बजेपछि नै देख्न सुरु गर्नेछन् ।
पृथ्वीको छायाँ चन्द्रमामा परेपछि हाम्रो प्राकृतिक स्याटेलाइटका रुपमा रहेको चन्द्रमा रगतजस्तै रातो देखिनेछ । अमेरिकाभरबाटै उक्त रोमाञ्चक दृश्य हेर्न सकिने भएको छ ।
यो चन्द्रग्रहण अमेरिका, युरोप, अफ्रिका लगायत विश्वका कैयन भागबाट हेर्न सकिनेछ । २ दशमलव ७ बिलियन व्यक्तिले ग्रहणको केहीभाग हेर्न सक्ने अनुमान गरिएको छ ।
सूर्यास्त भएको केही समयपछि नै चन्द्रमाको देब्रेतिरको भाग अँध्यारो देखिन सुरु गर्नेछ । तर मुख्य घटना भने न्युयोर्क समय अनुशार १० बजेर २८ मिनेटमा सुरु हुनेछ । त्यतीबेला चन्द्रमा पृथ्वीको केन्द्रीय छायामा प्रवेश गर्नेछ । यो समयमा चन्द्रमाको केही भाग टोकेको जस्तो दृश्य देखिनेछ ।
सोमबार विहान १ बजेर ५६ मिनेट जाँदा यो परिघटना समाप्त हुनेछ ।