न्युयोर्कको सुपरमार्केटमा गोली चल्दा १० को मृत्यु, १८ बर्षको बन्दुकधारी हिराशतमा
प्रकाशित मिति : जेष्ठ १, २०७९ आईतबार
अमेरिकाको न्युयोर्क राज्यको बफेलोमा एउटा सुपरमार्केटमा गोली चल्दा १० जनाको मृत्यु भएको छ । एकजना श्वेत टिनएजरले ५० राउण्ड गोली चलाएको अधिकारीहरुले बताएका छन् ।
यो घटनालाई सम्भावित घृणाको घटना भएको आशंका गरिएको छ । गोली चलाउने संदिग्ध १८ बर्षका टिनएजरलाई हिराशतमा लिइएको छ । गोली चलाउने व्यक्तिले शनिबार दिउसो भएको उक्त गोलीकाण्ड सामाजिक सञ्जालमा समेत लाइभ गरेका थिए ।
गोली चलाउने व्यक्तिले शैन्य पोशाक र कवच लगाएको जनाइएको छ । सुरुमा ४ जनालाई पार्किङ लटमा गोली हानेको जनाइएको छ । त्यसपछि स्टोरभित्र पसेर गोली चलाउने क्रममा सुरक्षामा खटिएका पूर्व प्रहरी अधिकारीसँग जम्काभेट भएको थियो । सुरक्षामा खटिएका प्रहरी अधिकारीले बन्दुकधारीलाई गोली हानेपनि कवचका कारण कुनै असर परेन ।
त्यसपछि बन्दुकधारीले स्टोरभित्र ९ जनामाथि गोली चलाएको थियो । सुचना पाएको एक मिनेटमा नै प्रहरी घटनास्थलमा पुगेको थियो । गोली लागेका १३ जनामध्ये ११ जना अश्वेत र २ जना श्वेत रहेका छन् ।
गोली हानिएकाहरुमा ४ जना स्टोरका कर्मचारीहरु रहेका छन् भने अरु सबै ग्राहकहरु हुन् । मारिनेमा स्टोर सुरक्षामा खटिएका पूर्व प्रहरी समेत छन् । घाइते ३ जनाको अवस्था जोखिमबाहिर रहेको जनाइएको छ ।
बन्दुक चलाउने संदिग्ध न्युयोर्कको कोन्क्लीन निवासी पेटेन जेनड्रोन रहेको जनाइएको छ । उसले न्युयोर्क काउन्टीबाट बफेलोको स्टोरमा शुक्रबारमात्र यात्रा गरेको जनाइएको छ ।
बन्दुकधारीले सुपरमार्केट गोलीकाण्डमा प्रयोग भएको राइफल आफ्नो घर भएको ब्रुम काउन्टीमा बैध रुपमा नै किनेको जनाइएको छ । उक्त राइफल पछि गैरकानूनी रुपमा परिस्कृत गरिएको थियो ।