अमेरिकाको विसकन्सिनमा २१ जनामाथि गोली प्रहार, मेयरबाट कर्फयु आदेश
प्रकाशित मिति : बैशाख ३१, २०७९ शनिबार
अमेरिकाको विसकन्सिनको मुल्हाकीमा शुक्रबार राती २१ जनामाथि गोली प्रहार भएको छ । तीनवटा घटनामा उनीहरु घाइते भएका हुन् ।
झण्डै ११ हजार व्यक्ति जम्मा भएर खेल हेरेको एरिनाबाट नजिकै भएको गोलीकाण्डमा १७ जना घाइते भएका छन् । घटनामा घाइते हुनेहरु १५ देखि ४७ बर्षसम्मका रहेका छन् ।
घटनामा कसैको पनि मृत्यु भएको छैन । सबै घाइतेहरु बाँच्ने अपेक्षा गरिएको प्रहरीले जनाएको छ । शुक्रबार राती ११ बजेर ९ मिनेटमा उक्त गोलीकाण्ड भएको हो ।
घटनासँग सम्बन्धित भएको आशंकामा १० जनालाई हिराशतमा लिइएको छ । उनीहरुमध्ये पनि ५ जना घाइते भएका छन् । प्रहरीले घटनास्थलबाट ९ वटा बन्दुक बरामद गरेको थियो । घटनाबारे थप अनुसन्धान भइरहेको प्रहरीले जनाएको छ ।
यो घटनाभन्दा झण्डै २ घण्टा अगाडि डियर डिस्ट्रिक्टमा भएको अर्को गोलीकाण्डमा ३ जना घाइते भएका थिए । घाइते हुनेहरुमा २६ र २९ बर्षका २ जना पुरुषहरु र १६ बर्षकी एकजना टिनएजर रहेको जनाइएको छ । १९ बर्षका टिनएजरलाई हिराशतमा लिइएको छ ।
त्यस्तै राती साढे १० बजे भएको अर्को घटनामा एकजना २० बर्षका पुरुष घाइते भएका छन् । तर यो घटना अन्य घटनासँग असम्बन्धित देखिएको छ ।
घटनापछि मुल्हाकी सिटीका मेयरले कर्फयु आदेश जारी गरेका छन् । कर्फयु शनिबार राती ११ बजेदेखि आइतबार विहान साढे ५ बजेसम्म जारी रहनेछ ।