८ महिना अगाडि अमेरिका आएका १९ बर्षका सन्दीप तामाङको मिनिसोटा दुर्घटनामा मृत्यु
प्रकाशित मिति : बैशाख २८, २०७९ बुधबार
अमेरिकाको वेष्टर्न मिनेसोटामा भएको कार दुर्घटनामा १९ बर्षका नेपाली सन्दीप तामाङको मृत्यु भएको छ । सोमबार बेलुका क्ले काउन्टीको हाईवे १० र १७० स्ट्रीट नर्थको इन्टरसेक्सनमा ६ बज्नलाग्दा दुर्घटना भएको प्रहरीले जनाएको छ ।
फर्गोबाट झण्डै १५ माइल पूर्वमा उक्त दुर्घटना भएको हो । तामाङ मिनिसोटाको मुरहेडमा बस्दै आएको जनाइएको छ । तामाङले हाइवेमा पश्चिमतिर जाने लेन क्रस गर्न खोज्दा ड्राइभरतिरको साइडमा अर्को गाडीमा ठोक्किएको थियो ।
दुर्घटना अगाडि तामाङले १७० स्ट्रीटको रोक्ने सिग्नलमा आफ्नो गाडी केहीबेर रोकेका थिए । तामाङले अमेरिकामा अन्तर्राष्ट्रिय विद्यार्थीका रुपमा अध्ययन गर्दै आएका थिए ।
तामाङ गत अगस्तमा मात्र अमेरिका आएका हुन् । उनी मिनिसोटा स्टेट कम्युनिटी एण्ड टेक्निकल कलेजमा अध्ययन गरिरहेका थिए ।
उनको शव नेपाल पठाउनका लागि अहिले गोफण्डमीमा अभियान सुरु गरिएको छ । शव नेपाल पठाउन र बाँकी रकम परिवारको सहयोगका लागि अभियान चलाइएको हो ।
२० हजार डलरको लक्ष्यसहित सुरु गरिएको अभियानमा अहिलेसम्म ११ हजार डलर संकलन भइसकेको छ ।
तपाई पनि सहयोग गर्न चाहनुहुन्छ भने यहाँ क्लीक गर्नुहोला ।
गत सातामात्र अमेरिकाको न्यूजर्सीमा मोटरसाइकल दुर्घटनामा नेपाली युवा २९ बर्षका का पृथ्बी लम्सालको निधन भएको थियो । दुर्घटनामा घाइते लम्साललाई उपचारका लागि कुपर हस्पिटल ट्रामा सेन्टरमा लगिएपनि उपचारकै क्रममा निधन भएको थियो ।
लम्साल मासाचुसेट्सको नर्थ इस्टर्न युनिभर्सिटीबाट ग्रयाजुएट भएर कामको सिलसिलामा विगत एक डेढ बर्ष देखि भर्जिनिया बस्दै आएका थिए । न्युयोर्कमा साथीलाई भेटेर भर्जिनिया फर्कने क्रममा दुर्घटना भएको थियो ।
उनको शव नेपाल पठाउन र परिवारको सहयोगका लागि गोफण्डमीमा झण्डै ५८ हजार डलर संकलन भइसकेको छ ।
स्वर्गीय लम्साल बिगत लामो समय देखि बोस्टनमा बसेर बोस्टन लोक सुसेली समूहमा रही समाजमा योगदान दिदै आएका टंक लम्सालका छोरा हुन् । टंक लम्साल पारिवारिक कारणले गर्दा नेपाल फर्केका थिए ।