ट्वीटर किन्ने योजना सफल भए ट्रम्पमाथिको प्रतिबन्ध हटाउने एलन मस्कको घोषणा
प्रकाशित मिति : बैशाख २७, २०७९ मंगलबार
ट्वीटर किन्ने योजना सफल भएको खण्डमा डोनाल्ड ट्रम्पलाई ट्वीटरमा लगाइएको प्रतिबन्ध हटाइने एलन मस्कले बताएका छन् । ट्रम्पलाई प्रतिबन्ध लगाउने निर्णय नैतिक रुपमा अत्यन्तै खराब रहेको र मुर्खतापूर्ण रहेको उनको भनाई छ ।
सन् २०२१ को जनवरी ६ मा ट्रम्पका समर्थकहरुले क्यापिटल हिलमा दंगा मच्याएपछि ट्वीटरले ट्रम्पलाई प्रतिबन्ध लगाएको थियो । ट्रम्पले हिंशा भड्काएको र थप हिंशा भड्काउने जोखिम रहेको भन्दै ट्वीटरले प्रतिबन्ध लगाएको थियो ।
मस्कले भनेका छन् – ‘ट्रम्पमाथि प्रतिबन्ध लगाउनु सही थिएन । यस्तो निर्णय गर्नु ट्वीटरको गल्ती थियो ।’
ट्रम्पले भने आफ्नै सामाजिक सञ्जाल टु्रथ सोसल स्थापना गरेका छन् । प्रतिबन्ध हटेपनि आफु ट्वीटरमा नफर्कने घोषणा ट्रम्पले गरिसकेका छन् ।