श्रीलंकामा सांसदले प्रदर्शनकारीमाथि गोली चलाए अनि आत्महत्या गरे
प्रकाशित मिति : बैशाख २६, २०७९ सोमबार
श्रीलंकामा सरकारका समर्थक र विपक्षीबीच भएको हिंसात्मक झडपमा सत्तारुढ दलका एक सांसदको मृत्यु भएको छ ।
सत्तारुढ दलका सांसद अमरकीर्ति अथुकोरालाले सोमबार विरोधी प्रदर्शनकारीमाथि गोली चलाएर अनि आफैलाई गोली हानेका छन् । कोलम्बोको बाहिरी क्षेत्रमा दुर्घटना भएको हो ।
समाचार एजेन्सी एएफपीका अनुसार अमरकीर्तिले निताम्बुआमा आफ्नो कार रोक्न खोजिरहेका दुई व्यक्तिमाथि गोली चलाएको प्रहरीले जनाएको छ। गोली लागेर एक जनाको मृत्यु भएको छ ।
त्यसपछि जनताको आक्रोशबाट बच्न सांसदले नजिकैको भवनमा लुक्ने प्रयास गरे । तर आक्रोशित मानिसहरूले पूरै भवनलाई घेरा हालेका थिए। मानिसले घेरेको देखेर सांसदले आफैँलाई गोली हानेका थिए, जसका कारण उनको मृत्यु भएको थियो ।
श्रीलंकामा सोमबारदेखि सरकार समर्थक र विपक्षीबीच झडप सुरु भएको छ । कोलम्बोमा भएको झडपमा १३८ जना घाइते भएका छन् ।
सरकार समर्थक प्रदर्शनकारीहरूले गाले फेसमा प्रदर्शन गरिरहेका मानिसहरूको पाल उखेल्न थालेपछि झडप सुरु भएको हो। सरकार समर्थकहरुले आन्दोलनकारीमाथि आक्रमण गरेपछि हिंसा सुरु भएको हो ।