न्युयोर्कको ट्रेनमा २३ जना घाइते हुनेगरी गोली चलाउने व्यक्ति सर्वसाधारणको टिप्सबाट पक्राउ
प्रकाशित मिति : चैत्र ३०, २०७८ बुधबार
न्युयोर्कको ट्रेनमा २३ जना घाइते हुनेगरी गोली चलाउने व्यक्ति सर्वसाधारणले दिएको टिप्सको आधारमा पक्राउ परेको अधिकारीहरुले जनाएका छन् । गोली चलाउने ६२ बर्षको फ्रयांक जेम्सलाई बुधबार दिउसो पक्राउ गरिएको छ । अधिकारीहरुले बन्दुकधारीबारे सुचना दिनेलाई ५० हजार डलर पुरस्कार तोकेका थिए ।
म्यानहटनको इस्ट भिलेज क्षेत्रबाट कुनै घटनाविना नै पक्राउ गरिएको प्रहरीले जनाएको छ । सर्वसाधारणले फोन गरेर उक्त व्यक्ति म्याकडोनाल्डमा रहेको प्रहरीलाई जानकारी दिएका थिए । फोन गर्नेले उक्त व्यक्तिलाई समाचारमा देखेको र प्रहरीले खोजिरहेकाले जानकारी दिएको बताएका थिए ।
फोन गर्ने व्यक्तिले अपरेटरलाई आफू म्याकडोनाल्डभित्र फोन चार्ज गर्दै हुने बताएका थिए । तर उनले फोन नम्बर भने दिएनन् । केही क्षण पछि फोन काटिएको थियो । र ९११ मा अर्को व्यक्तिको फोन आएको थियो । प्रहरी अधिकारीहरु म्याकडोनाल्डमा पुग्दा उनीहरुलाई भेट्टाउन भने सकेनन् ।
तर एक ब्लक नजिकै गोली चलाउने व्यक्तिलाई देखेको अर्का सर्वसाधारणले जानकारी दिए । त्यसपछि प्रहरीले पक्राउ गर्न सफल भएको थियो । फोनकल आएको झण्डै १ घण्टापछि प्रहरीले दिउसो पौने २ बजेतिर गोली चलाउने जेम्सलाई पक्राउ गर्न सफल भएको थियो । मंगलबारको गोलीकाण्डमा १० जनामाथि गोली लागेको थियो भने अरु १३ जना भागदौड र धुँवाका कारण घाइते भएका थिए ।
गोली चलाउने व्यक्तिले फिलाडेल्फियामामा भ्यान भाडामा लिएर आएको जनाइएको छ । घटनास्थलबाट प्रहरीले ह्याण्डगन लगायतका हतियारका सामाग्रीहरु र विष्फोटकहरु समेत बरामद गरेको थियो । प्रहरीले गाडी सडकमा छाडिएको अवस्थामा भेटाएको थियो ।
घटनामा गोली लागेका १० मध्ये ५ जनाको अवस्था गम्भिर रहेको जनाइएको छ । तर कोहीपनि ज्यान गुमाउने जोखिममा भने नरहेको प्रहरीले जानकारी दिएको छ ।