न्युयोर्कको ब्रुकलिनमा गोली चलाउने व्यक्ति अझै फरार, ५० हजार डलर इनाम घोषणा, घाइतेको संख्या २३
प्रकाशित मिति : चैत्र २९, २०७८ मंगलबार
न्युयोर्कको ब्रुकलिनमा ट्रेनमा गोली चलाउने व्यक्ति अझै फरार रहेको र खोजी कार्य जारी रहेको प्रहरीले जनाएको छ । उक्त व्यक्तिले ट्रेनभित्र धुँवा फैलाउने ग्रिनेड हानेर गोली चलाउँदा १० जना गोली लागेर र १३ जना भागदौड र धुँवाका कारण घाइते भएका छन् ।
गोली चलाउने व्यक्तिको पहिचान भइसकेको प्रहरीले जनाएको छ । प्रहरीले साढे ५ फिट अग्लो फ्रयांक जेम्स नामको अश्वेत व्यक्तिको खोजी गरिरहेको छ । साथै उक्त व्यक्तिबारे कुनै जानकारी भएमा प्रहरीलाई खबर गरिदिन अनुरोध गरिएको छ ।
६२ बर्षीय उक्त व्यक्तिले फिलाडेल्फियामामा भ्यान भाडामा लिएर आएको जनाइएको छ । घटनास्थलबाट प्रहरीले ह्याण्डगन लगायतका हतियारका सामाग्रीहरु र विष्फोटकहरु समेत बरामद गरेको छ । प्रहरीले गाडी सडकमा छाडिएको अवस्थामा भेटाएको थियो ।
घटनामा गोली लागेका १० मध्ये ५ जनाको अवस्था गम्भिर रहेको जनाइएको छ । तर कोहीपनि ज्यान गुमाउने जोखिममा भने नरहेको प्रहरीले जानकारी दिएको छ । अधिकारीहरुले बन्दुकधारीबारे सुचना दिनेलाई ५० हजार डलर पुरस्कार तोकेका छन् ।