न्युयोर्कमा १६ बर्षकी किशोरीको गोली हानी हत्या गर्ने १७ बर्षकालाई बयस्क सरह मुद्दा
प्रकाशित मिति : चैत्र २८, २०७८ सोमबार
न्युयोर्कको ब्रोंक्समा १६ बर्षकी किशोरीको गोली हानी हत्या गर्ने १७ बर्षका व्यक्तिलाई बयस्क सरह मुद्दा चलाइने भएको छ । अनलाइनमा पार्टपुर्जा किनेर जडान गरिएको भूताहा बन्दुकबाट किशोरीको हत्या भएको प्रहरीले जनाएको छ ।
युनिभर्सिटी प्रेप चार्टर हाइस्कुलमा ९ कक्षामा अध्ययनरत एन्जिला याम्बोमाथि सेन्ट एन्स एभिन्यु र इस्ट १५६ स्ट्रीटको कर्नरमा गोली हानिएको थियो । उनी विद्यालयबाट फर्कदै थिइन् । उनीसहित ३ जनामाथि गोली हानिएपनि गोलीले एन्जिलाको फोक्सो छेडेपछि मृत्यु भएको थियो ।
बन्दुक चलाउने १७ बर्षको जेरेमिया रायनलाई प्रहरीले घरबाटै पक्राउ गरिसकेको छ । रायनविरुद्ध बयस्क सरह हत्या, हत्याको प्रयास, नरसंहार र आपराधिक बन्दुक बोकेको दुईवटा अभियोगहरु लगाइएको छ ।
मृतक एन्जिलाको दाहसंस्कार मंगलबार गरिने भएको छ ।