सर्वोच्चको न्यायाधिसमा पहिलो अश्वेत महिला नियुक्तीका लागि सिनेटमा मतदान गरिदै
प्रकाशित मिति : चैत्र २४, २०७८ बिहीबार
सर्वोच्चको न्यायाधिसमा पहिलो अश्वेत महिला नियुक्तीका लागि आज अमेरिकी सिनेटमा मतदान गरिने भएको छ । सबै डेमोक्रेटिक सिनेटरहरु र केही रिपब्लिकनहरुले उनको नियुक्तीलाई समर्थन गर्दै मतदान गर्ने अपेक्षा गरिएको छ । आज अन्तिम मतदानपछि झण्डै ६ साता लामो प्रकृया पूरा हुनेछ ।
अमेरिकी राष्ट्रपति जो बाइडेनले सर्वोच्च अदालतको न्यायाधिसमा केतन्जी ब्राउन ज्याक्सनलाई नियुक्ती प्रस्ताव गरेका हुन् । सर्वोच्चमा पहिलो अश्वेत महिलालाई नियुक्त गरेर बाइडेनले अमेरिकी इतिहासमा नै नयाँ रेकर्ड कायम गर्ने भएका छन् ।
५१ बर्षकी ज्याक्सन अमेरिकाको सर्वोच्च अदालतको २३३ बर्ष लामो इतिहासमा तेश्रो अफ्रिकन अमेरिकन हुनेछिन् भने पहिलो अश्वेत महिला हुनेछिन् । बाइडेनले गतबर्ष उनलाई वासिंटन डिसीमा रहेको पुनरावेदन अदालतमा पदोन्नती गर्नु अगाडि उनले झण्डै ८ बर्ष वासिंटनकै अदालतमा ८ बर्ष न्यायाधिसका रुपमा काम गरेकी थिइन् ।
अमेरिकी सिनेटबाट उनको नियुक्ती सदर भएपछि उनी सर्वोच्चमा उदारबादी न्यायाधिसका रुपमा अबका कैयन बर्ष रहनेछिन् । ज्याक्सनको नियुक्ती सर्वोच्चमा रहेको अहिलेको समिकरणमा भने फेरवदल हुने छैन । अहिले सर्वोच्चमा ६ जना रुढिवादी र ३ जना उदार न्यायाधिसहरु रहेका छन् । उदारवादी न्यायाधिस स्टेफन ब्रेयरकै स्थानमा उनलाई नियुक्त गरिने भएकाले पहिले कै समिकरण कायम रहनेछ ।
त्यस्तै उनको नियुक्तीपछि सर्वोच्चमा ५ जना पुरुष र ४ जना महिला न्यायाधिस हुनेछन् । यो पनि अमेरिकी इतिहासमा नयाँ रेकर्ड हो । सन् २००९ मा अमेरिकाको सर्वोच्च अदालतमा ८ जना पुरुष र एकजनामात्र महिला न्यायाधिस रहेका थिए । अहिले सोनिया सोटोमेयर, एलेना कागन र एमी कोने ब्यारेट सर्वोच्चका महिला न्यायाधिस हुन् ।