वार्तामा रुसले भन्यो, ‘युक्रेनमा आक्रमण कम गर्छौ’
प्रकाशित मिति : चैत्र १५, २०७८ मंगलबार
रुस र युक्रेनबीच मंगलबार इस्तानबुलमा भएको शान्ति वार्तामा रुसी आक्रमण सुरु भएयता पहिलो पटक प्रगतिको संकेत देखिएको छ ।
रुसले युक्रेनमा हुने सैन्य आक्रमणलाई घटाउने बताएको छ। तर रुसको यो प्रतिवद्धताप्रति पश्चिमा राष्ट्रहरूले विश्वास गर्न नसकिने भन्दै शंका व्यक्त गरिरहेका छन् । टर्कीका राष्ट्रपति रेसेप तैयप एर्दोगानले इस्तानबुलस्थित आफ्नो कार्यालयमा रुस–युक्रेन वार्ताको आयोजना गरेका थिए ।
रसियाले शान्ति वार्तामा किभ र चेर्निहाइभमा आफ्ना आक्रमणहरूलाई कम गर्ने बताएको छ। रुसको यो भनाइप्रति बेलायत र अमेरिकाले होसियार हुन अपिल गरेका छन् । अमेरिकी राष्ट्रपति जो बाइडेनले युक्रेनलाई सतर्क रहन आग्रह गर्दै भने, ‘उनीहरूमाथि कस्तो कारबाही भइरहेको छ भनी नदेख्दासम्म म यो बयानमा केही देख्दिन।’
उनले गरेका वाचा पुरा भए नभएको हेर्नु पर्ने बताए । अर्कोतर्फ अमेरिकी विदेशमन्त्री एन्टोनी ब्लिन्केनले रुसले के भन्छ र के गर्छ भन्नेमा भिन्नता रहेको बताएका छन् ।
तर कूटनीतिक हिसाबले पनि टर्कीले शान्ति वार्तालाई ‘अर्थपूर्ण प्रगति’तर्फ अघि बढिरहेको बताएको छ। मंगलबार भएको वार्ता तीन घन्टासम्म चलेको भए पनि सञ्चारमाध्यमबाट थोरै जानकारी मात्रै फिल्टर गरिएको छ ।