क्यापिटल हिल दंगाको दिन ट्रम्पको फोन ८ घण्टा रेकर्ड गर्न छुटाइएको खुलासा
प्रकाशित मिति : चैत्र १५, २०७८ मंगलबार
गतबर्ष जनवरी ६ को क्यापिटल हिल दंगाको दिनमा तत्कालिन अमेरिकी राष्ट्रपति डोनाल्ड ट्रम्पको फोनकल रेकर्ड गर्न ८ घण्टा छुटाइएको खुलासा भएको छ । ह्वाइट हाउसमा राष्ट्रपतिको फोन औपचारिक रुपमा रेकर्ड गरिने भएतापनि उक्त दिन ट्रम्पको फोन ८ घण्टासम्म रेकर्ड नगरिएको संसदीय अनुसन्धान प्यानलले पत्ता लगाएको छ ।
विहान ११ बजेदेखि बेलुका ७ बजेसम्मको फोन रेकर्ड नगरिएको जनाइएको छ । उक्त अवधिमा कैयन पटक फोनकलहरु भएतापनि रेकर्ड नगरिएकाले ट्रम्पको कोसँग के कुराकानी भएको थियो भन्नेबारे जानकारी सार्वजनिक हुन सकेको छैन । यद्यपी अनुसन्धान प्यानल उक्त अवधिमा ट्रम्पले के के गरेका थिए भन्नेबारे बेखबर भने छैन ।
संसदीय प्यानललृ फरक बृहत फोनकल रेकर्डका लागि अनुरोध गरेको छ भने ८ सयभन्दा धेरैजना प्रत्यक्षदर्शीसँग कुराकानी समेत गरिसकेको छ । कुराकानी गरिएकामध्ये कैयन व्यक्ति ट्रम्पका सहयोगीहरु समेत हुन्, जसले उक्त दिन ट्रम्पसँग बिताएका थिए । संसदीय प्यानलले ट्रम्पका तत्कालिन चिफ अफ स्टाफका हजारौं टेक्स्ट सन्देशहरु पनि संकलन गरेको छ ।
ट्रम्पले कुराकानीका लागि अरुको फोन समेत प्रयोग गर्ने गरेका थिए । साथै उनले ह्वाइटहाउस बाहेक आफ्नो व्यक्तिगत फोन समेत प्रयोग गर्ने गरेका थिए । प्राय उनले फोनमा कुरा गर्दा ह्वाइटहाउसको स्वीचबोर्ड बाइपास गरेर सिधै फोन डायल गरेर कुराकानी गर्ने गरेको जनाइएको छ ।