१५ बर्षकी बालिकालाई भेट्न ८ सय माइलभन्दा धेरै गाडी चलाएर आएका व्यक्ति टेक्सासमा पक्राउ
प्रकाशित मिति : चैत्र ११, २०७८ शुक्रबार
१५ बर्षकी बालिकालाई भेट्न ८ सय माइल भन्दा बढी गाडी चलाएर मिनिसोटाबाट टेक्सास आएका २७ बर्षका व्यक्ति प्रहरी फन्दामा परेका छन् । ती व्यक्ति अण्डरएज बालिकासँग यौन सम्पर्कका लागि नर्थ टेक्सास आएका थिए ।
बलबालिका शोषणविरुद्धको युनिटका अण्डरकभर अधिकारीहरुले १५ बर्षकी बालिकाजस्तै बनेर अनलाइनमा ती व्यक्तिसँग कुराकानी गरेका थिए । रिचार्ड जेन्किन्स दोश्रो नामका २७ बर्षका पुरुषले बालिका १५ बर्षकी भएको थाहा पाउँदा पाउँदै पनि यौन सम्पर्कका लागि ८ सय माइल भन्दा धेरै गाडी चलाएर आएका थिए ।
रिचार्डले बालिकालाई आफ्ना बाबुआमासँग एकसाताका लागि मिनिसोटामा क्याम्पमा बस्न जाने बहाना बनाउन समेत सिकाएका थिए । सोही अनुरुप उनी एकसाताका लागि बालिकालाई लिन आएका थिए । रिचार्डले च्याटका क्रममा यौन सम्पर्कको आशय स्पष्ट रुपमा बताएका थिए ।
बालिकालाई भेट्न नर्थ टेक्सासको पार्कमा पुगेका रिचार्डलाई अनुसन्धानकर्ताहरुले पक्राउ गरेका थिए । किनभने त्यहाँ कुनै बालिका थिइनन्, केबल अण्डरकभर अधिकारीहरुमात्र थिए । अण्डरएजसँग अनलाइनबाट यौन सम्पर्कको प्रयास गरेको अभियोग उनीमाथि लगाइएको छ ।
उनलाई मुद्दा चलुन्जेल सम्मका लागि २ लाख ५० हजार डलर धरौटीमा रिहा गरिएको छ । आफ्ना बालबालिकाहरुलाई अनलाइन च्याटमा निगरानी राख्न अभिभावकहरुलाई अनुरोध गरेको छ ।
अनलाइनबाट च्याट गरेर बालिकासँग यौनसम्पर्कका लागि भेट्न जाने क्रममा अमेरिकामा कैयन नेपालीहरु समेत फसेका छन् । केही नेपालीहरुले यस्ता मामलामा देशनिकालाको समेत सामना गर्नुपरेको छ ।