अमेरिकामा पेट्रोलियम पदार्थको मूल्यबृद्धिपछि मासिक ३ सय डलर राहत चेक पठाउने बिल प्रस्ताव
प्रकाशित मिति : चैत्र ९, २०७८ बुधबार
अमेरिकामा पेट्रोलियम पदार्थको मूल्यबृद्धिपछि अमेरिकनहरुलाई राहत उपलब्ध गराउनका लागि राहत चेक पठाउने प्रस्ताव गरिएको छ । केही सांसदहरुले सरकारबाट राहत चेक पठाउनुपर्ने बिल प्रस्ताव गरेका छन् ।
अमेरिकामा पेट्रोलको मूल्य औषतमा ४ डलर नाघेको खण्डमा २ जना बच्चासहितको परिवारलाई मासिक ३ सय डलरको राहत चेक पठाउने बिलमा प्रस्ताव गरिएको छ । अहिले अमेरिकामा पेट्रोलको औषत मूल्य प्रति ग्यालेन ४ डलर २४ सेन्टस छ । क्यालिफोर्नियाका सांसद माइक थोम्सन, कनेक्टिकटका सांसद जोन लार्सन र इलिनोयका सांसद लाउरेन अण्डरउडले यस्तो प्रस्ताव ल्याएका हुन् । तीनजना नै डेमोक्रेटिक सांसद हुन् ।
ग्यास रिबेट ऐन नामको यो बिलले हरेक परिवारलाई उर्जाका लागि मासिक १ सय डलर प्रदान गर्नेछ भने २ जना बच्चा भएको एउटा परिवारले ३ सय डलरसम्म पाउनेछन् । यो राहत सन् २०२२ भरका लागि लागु हुनेछ ।
बिल अनुशार संयुक्त वा एकल दुबै करदाताले १ सय डलर पाउनेछन् भने डिपेन्डेन्टले अतिरिक्त १ सय डलर पाउनेछन् । बार्षिक ७५ हजार डलर भन्दा कम आम्दानी हुनेहरुले यो राहत पाउनेछन् । संयुक्तरुपमा कर फाइल गर्नेहरुका हकमा १ लाख ५० हजारभन्दा कम बार्षिक आम्दानी हुनेहरुले यो रकम पाउनेछन् ।
बुधबार क्यालिफोर्नियाका गभर्नर गेभिन न्युसमले आफ्नो राज्यमा बस्नेहरुका लागि हरेक गाडीको ४ सय डलरका दरले राहत चेक पठाउने प्रस्ताव गरेको बताएका छन् । एकजनालाई बढीमा २ वटा गाडीको ८ सय डलरसम्म पठाउने प्रस्ताव गरिएको छ ।
क्यालिफोर्निया राज्य संसदबाट यो प्रस्ताव पारित भइसकेपछि आगामी जुलाईसम्म क्यालिफोर्नियाका बासिन्दाले यो रकम प्राप्त गर्ने अपेक्षा गरिएको छ । बुधबार अमेरिकाको क्यालिफोर्नियामा पेट्रोलको औषत मूल्य प्रति ग्यालेन ५ डलर ८७ सेन्टस पुगेको थियो ।
मूल्यबृद्धिका कारण यो बर्ष एउटा परिवारका लागि औषतमा बार्षिक खर्चमा २ हजार डलर बढी खर्च हुने अनुमान गरिएको छ । सन् १९८२ मा भएको मुद्रास्फीतिका कारण एउटा परिवारले बार्षिक औषतमा १ हजार डलर बढी खर्च गर्नुपरेको थियो ।