अमेरिका र फिलिपिन्सद्वारा अहिलेसम्मकै सबैभन्दा ठूलो सम्युक्त युद्ध अभ्यास
प्रकाशित मिति : चैत्र ८, २०७८ मंगलबार
फिलिपिन्स र संयुक्त राज्य अमेरिकाले अर्को हप्ता द्वीपसमूह राष्ट्रमा अहिलेसम्मकै सबैभन्दा ठूलो संयुक्त सैन्य अभ्यास शुरु गर्न लागेको अमेरिकी अधिकारीहरूले मङ्गलबार जनाएका छन् । बढ्दो चिनियाँ प्रभाव सामु आफ्नो बलियो रक्षा सम्बन्ध देखाउँने अभिप्रायले सो अभ्यास गर्न लागिएको विश्लेषण गरिएको छ।
लगभग ९,००० फिलिपिनो र अमेरिकी सैनिकहरूले लुजोनको मुख्य टापुमा १२ दिनसम्म सो युद्धाभ्यासमा भाग लिनेछन् । मार्च २८ मा शुरु हुने उक्त अभ्यासमा सामुद्रिक सुरक्षा, लाइभ फायर तालिम, आतङ्कवाद प्रतिरोध, मानवीय सहायता र विपद् राहतलगायत अन्य कुराहरू समेटिने अमेरिकी दूतावासले विज्ञप्तिमार्फत जनाएको छ ।
“(दुबै पक्षले) साझा रणनीति, प्रविधि र प्रक्रियाहरू विस्तार र अगाडि बढाउन सँगै तालिम दिनेछन् जसले हाम्रो प्रतिक्रिया क्षमता र वास्तविक-विश्व चुनौतीहरूको लागि तत्परतालाई बलियो बनाउँछ,” अमेरिकी तेस्रो समुद्री डिभिजनका कमाण्डर मेजर जनरल जे बार्गेरोनले बताएका चन् । लामो समयका सहयोगीहरू बीचको हालैका युद्धाभ्यासहरू दक्षिण चीन सागरमा सम्भावित द्वन्द्वमा केन्द्रित देखिन्छन् ।
चीनले विवादित चट्टानहरूमा कृत्रिम टापुहरू निर्माण गरेर र तिनीहरूमा हतियारहरू स्थापना गरेर आफ्नो अडानलाई बलियो बनाएको आरोप लाग्ने गरेको छ । फिलिपिन्स, ब्रुनाई, मलेशिया, ताइवान र भियतनामले पनि पानीमाथि दावी गर्दै आएका छन्। फिलिपिन्सले चिनियाँ नौसेनाको जहाजलाई आफ्नो द्वीपसमूहको पानीमा अवैध रूपमा तरिरहेको दाबी गरेपछि मनिला र बेइजिङ बीचको तनाव गत हप्ता बढेको थियो ।
यो सैन्याभ्यास युक्रेनमा रुसी आक्रमणको बीचमा हुन लागेको छ जहाँ अमेरिका र यसका सहयोगीहरूले कीभलाई रक्षात्मक हतियारहरू उपलब्ध गराउँदै आएका छन् र मस्कोमाथि आर्थिक प्रतिबन्ध पनि लगाएका छन्। राष्ट्रपति रोड्रिगो डुटेर्टेले सोमबार फिलिपिन्स संयुक्त राज्य अमेरिकासँगको सुरक्षा गठबन्धनका कारण द्वन्द्वमा “संलग्न” भएको बताएका छन् । सो गठबन्धनमा पारस्परिक रक्षा सन्धि र अमेरिकी सेनालाई फिलिपिन्सको आधारहरूमा रक्षा उपकरण र आपूर्तिहरू भण्डारण गर्न अनुमति समावेश छ। -एएफपी/फाईल फोटो