अमेरिका आएको २ बर्ष नपुगेका कागजपत्रविहिनलाई अदालती सुनुवाईविना डिपोर्ट गर्ने नीति खारेज
प्रकाशित मिति : चैत्र ७, २०७८ सोमबार
अमेरिका आएको दुईबर्ष नपुगेका कागजपत्रविहिनहरुलाई अमेरिकाको जुनसुकै स्थानबाट पक्राउ गरेर अध्यागमन अदालतमा पेश नगरीकनै तीब्र गतिको देशनिकालामा राख्ने ट्रम्प प्रशासनको नीति बाइडेन प्रशासनले खारेज गरिदिएको छ । सन् २०१९ को जुलाई २३ मा सुचना प्रकाशित गरेर ट्रम्प प्रशासनले अदालती सुनुवाईविना नै तीब्र गतिमा देशनिकाला गर्ने नीति ल्याएको थियो ।
डिपार्टमेन्ट अफ होमल्याण्ड सेक्युरिटीले फेडरल रजिष्टरमा सुचना प्रकाशित गरेर मार्च २१ सोमबारदेखि लागु हुनेगरी पहिलेको नीति खारेज गरेको हो । ट्रम्पकालिन नीति खारेज भएपछि अमेरिकामा दुईदशकदेखि अभ्यास हुँदै आएको नीति नै पुन कार्यान्वयनमा आएको छ ।
अमेरिकी सिमाक्षेत्रको एकसयमाइलभित्र पक्राउ परेका र अमेरिका आएको दुईसाता पूरा नभएका कागजपत्रविहिनलाई अदालती सुनुवाईविना देशनिकाला गर्न सकिने प्रावधान रहेकोमा अबदेखि यही प्रावधान नै लागु हुनेछ । ट्रम्प प्रशासनले यो प्रावधानलाई बदलेर १४ दिनको साटो २ बर्ष बनाएको थियो ।
ट्रम्प प्रशासनको उक्त नीतिले एकसय माइलको प्रावधान पनि हटाएको थियो । जसका कारण अमेरिकाको जुन सुकै स्थानमा परिवारसहित बसेका कागजपत्रविहिनहरु पनि जोखिममा परेका थिए ।