रुसले युक्रेनमा प्रयोग गरेको हाइपरसोनिक मिसाइल के हो ? यो कति खतरनाक ?
प्रकाशित मिति : चैत्र ५, २०७८ शनिबार
युक्रेनमा अहिले पुटिनको सेनाले महाविनाशक मिसाइलबाट भीषण आक्रमण गरेको छ । रुसले हाइपरसोनिक मिसाइल किन्जल प्रयोग गरेर युक्रेनमा रहेको पश्चिमी हतियारको गोदाम ध्वस्त गरेको घोषणा पनि गरेको छ । रुसको रक्षा मन्त्रालयले युक्रेनमा हाइपरसोनिक मिसाइलबाट आक्रमण गरेको पहिलो पटक स्वीकार गरेको छ ।
रुसले युक्रेनमा प्रयोग गरेको यो महाविनाशक मिसाइल यति खतरनाक छ कि अहिलेसम्म कुनै पनि देशले यसलाई तोड्न सकेको छैन। यो मिसाइल परमाणु बम खसाल्न पनि सक्षम छ । आउनुहोस् यो क्षेप्यास्त्रको बारेमा सबै जानौं : यो त्यही मिसाइल हो जसलाई रुसी राष्ट्रपति भ्लादिमिर पुटिनले केही समयअघि ‘आदर्श हतियार’ भनेका थिए। यो मिसाइलले युक्रेनको डेल्याटिन गाउँमा रुसले हमला गरेको थियो, जुन गाउँ शहरभन्दा बाहिर छ र पहाडहरूले घेरिएको छ।
यो मिसाइल MIG-31 सुपरसोनिक फाइटर जेटबाट प्रहार गरिएको भनिएको छ, जुन रुसले कालिनिनग्रादको चकालोभस्क नौसेना बेसमा राखेको थियो। कालिग्राद पोल्याण्ड र लिथुआनियाको सिमानामा अवस्थित एक रूसी शहर हो, जहाँ रुसको ठूलो सैन्य क्याम्प पनि छ।
आवाजको भन्दा १० गुणा बढी गतिमा उड्न सक्ने
रुसको यो किञ्जल हाइपरसोनिक मिसाइल पुटिनले २०१८ मा देशलाई समर्पित गरेका थिए । यी मिसाइलहरू आवाजभन्दा १० गुणा बढी गतिमा उड्न सक्ने सक्षम छन् र आणविक बम खसाल्ने शक्ति छ। यति धेरै तिब्रगतिको कारण, यसले शत्रुलाई प्रतिबाद गर्ने मौका समेत दिँदैन र उसलाई नष्ट गर्दछ। रुसको हाइपरसोनिक मिसाइलको शक्तिलाई तोड्ने सक्ने तागत अमेरिकालगायत नेटोका कुनै पनि देशसँग नभएको बताइन्छ । अमेरिका अहिले हाइपरसोनिक मिसाइल तैनाथ गर्न युद्धस्तरमा लागिरहेको छ ।
किञ्जल हाइपरसोनिक मिसाइलले २ हजार किलोमिटरसम्म मार हान्न सक्छ । किञ्जल मिसाइलले परम्परागत विस्फोटक पदार्थका अतिरिक्त ५०० किलोटनको आणविक वारहेड पनि बोक्न सक्छ । यो हिरोसिमामा खसालेको आणविक बमभन्दा ३३ गुणा बढी शक्तिशाली हुन सक्छन् । किञ्जल हाइपरसोनिक मिसाइल ३ किलोमिटर प्रति सेकेन्डको गतिमा आक्रमण गर्ने क्षमताको हुन्छ । जसका कारण अत्याधुनिक वायु रक्षा प्रणाली पनि यसको अगाडि असफल सावित भएको छ ।
किञ्जलले नेटो देशमा आक्रमण गर्न ७ देखि १० मिनेट मात्र लाग्ने
भनिन्छ, यो हाइपरसोनिक मिसाइलमा सेन्सर र रडार खोज्नेहरू छन्, जसले यसलाई जमिनबाट समुद्रसम्म सही आक्रमण गर्न अतुलनीय शक्ति दिन्छ। सामान्यतया रुसले कालिनिनग्राद बेसमा मिग–३१ विमान तैनाथ गर्दैन, तर युक्रेनको युद्धलाई ध्यानमा राख्दै यी विमानहरू यहाँ पठाइएको हो । सैन्य विज्ञ रोब लीका अनुसार किञ्जल मिसाइललाई कालिनिनग्रादबाट प्रहार गरिएमा यसले पश्चिमी युरोपेली देशका अधिकांश राजधानी र टर्कीको राजधानी अंकारालाई ध्वस्त पार्ने शक्ति छ । यति मात्र होइन, किञ्जलको नाटो देशमा आक्रमण गर्न ७ देखि १० मिनेट मात्र लाग्ने छ । यस्तो अवस्थामा उनीहरुले प्रतिरोध गर्ने समय पनि पाउने छैनन् । (यो सामाग्री एजेन्सीको सहयोगमा तयार पारिएको हो ।)