अमेरिकाको पेन्सिलभेनियामा ४ बर्षीयले पेस्तोल खेलाउँदा गोली लागेर मृत्यु, दाजुबिरुद्ध हत्याअभियोग
प्रकाशित मिति : चैत्र ३, २०७८ बिहीबार
अमेरिकाको पेन्सिलभेनियामा ४ बर्षको बालकको हातमा पेस्तोल पुगेपछि खेलाउने क्रममा आफैलाई गोली लागेर मृत्यु भएको छ । बालकको मृत्युपछि उनका १८ बर्षका दाजुविरुद्ध आशयविनाको हत्याको अभियोग लगाइएको छ ।
प्रहरीका अनुशार रोमन ओगुलेरा आर्टिज नामका कोट्सभिल निवासी बालकले भरेको पेस्तोल उनका दाजुको बेडरुमको टेबुलबाट उठाएका थिए । त्यसपछि उनले दुर्घटनावश हतियार पड्काउँदा मृत्यु भएको थियो । बालकका दाजु भिक्टर लारा ओर्टिजले मंगलबार आफै प्रहरी समक्ष आत्मसमर्पण गरेका थिए ।
घटनाको बेलामा भिक्टर लारा ओर्टिज घरमा थिएनन् । तर उनले आफ्नो बेडरुमको ढोका खुला छाडेका कारण बालक कोठाभित्र पसेर पेस्तोल निकालेका थिए । बालकलाई सजिलै बन्दुकमा पहुच कायम गर्नबाट रोक्न नसकेकोमा दाजुबिरुद्ध प्रहरीले अभियोग लगाएको हो ।
जब लारा १७ बर्षका थिए, त्यतीबेला ३१ बर्षका विलियम थोमस भन्ने व्यक्तिले उक्त पेस्तोल ल्याएका थिए । उनीबिरुद्ध पनि लारा ओर्टिजका लागि गैरकानूनी रुपमा बन्दुक किनेको अभियोग लगाइएको छ । माइनरलाई हतियार दिएको र गैरकानूनी हतियार खरिदको प्रयास गरेको अभियोग उनीबिरुद्ध लगाइएको छ ।
विलियम थोमस भन्ने व्यक्ति विगतमा अपराधमा दोषी ठहर भएका कारण बन्दुक किन्नमा रोक लगाइएको थियो । तर आवेदनमा गलत विवरण दिएर उनले बन्दुक किनेको जनाइएको छ । गत फेब्रअरीमा १५ मा उनले बन्दुक पाउन सफल भएका थिए । त्यसको १ दिनपछि लारा ओर्टिजलाई उक्त बन्दुक दिइएको थियो ।
यसै साता शिकागोमा पनि यस्तै प्रकारको घटना भएको थियो । तीन बर्षको बालकले दुर्घटनावश बन्दुक चलाउँदा बच्चाकी आमाको मृत्यु भएको थियो । शिकागोको डोल्टनमा पार्किङ लटमा रहेको गाडीभित्र बालकले अन्जानमा गोली चलाएका थिए ।
बालककी आमालाई तत्काल अस्पताल लगिएको थियो । अस्पतालले उनलाई मृत घोषणा गरेको थियो । बालकले बन्दुक भेट्टाएर पड्काउँदा उक्त कारमा परिवारमा सदस्यहरु रहेका थिए ।
बालकका बाबुलाई प्रहरीले हिराशतमा लिएको छ । बन्दुकको स्वामित्व बालकका बाबुसँग रहेको र बालकको हातसम्म बन्दुक पुग्ने अवस्था आएकोमा बाबुलाई प्रहरीले हिराशतमा लिएको हो ।
अमेरिकामा यो बर्षमात्र बालबालिकाहरुका हातमा बन्दुक पुग्दा अन्जानमा र दुर्घटनावश गोली चलेका ४३ वटा घटना भएका छन् । जसमा १६ जनाको मृत्यु भएको छ भने २९ जना घाइते भएका छन् ।
गतबर्ष बालबालिकाका हातमा बन्दुक पुग्दा अन्जानमा दुर्घटनावश अमेरिकाभर ३७९ वटा घटना भएका थिए । जसमा १५४ जनाको मृत्यु भएको थियो भने २४४ जना घाइते भएका थिए ।