ओमिक्रोन भेरियन्टको बीए टु भर्सन अमेरिका र बाहिरका देशहरुमा बढ्दो, के डराउनुपर्ने अवस्था हो ?
प्रकाशित मिति : चैत्र ३, २०७८ बिहीबार
कोरोना भाइरसको ओमिक्रोन भेरियन्टको बीए टु भर्सन अमेरिका र बाहिरका देशहरुमा बढ्दो अवस्थामा देखिएको छ । हङकङ, यूके लगायतका देशमा कोरोना संक्रमणको पछिल्लो बृद्धिमा ओमिक्रोनको यो भेरियन्ट जिम्मेबार रहेको ठहर गरिएको छ ।
यूकेको स्वास्थ्य सुरक्षा एजेन्सीका अनुशार ओमिक्रोन भेरियन्टको बीए टु भर्सन यस अगाडिको बीए वान भर्सनको तुलनामा ८० प्रतिशत बढी संक्रामक रहेको पाइएको छ । बीए वान भर्सनले अमेरिकामा डिसेम्बरको अन्तिमसातादेखि संक्रमण उच्च बनाएको थियो । अहिले यूके र कैयन युरोपियन देशमा नयाँ भर्सन बीए टुले संक्रमण दर र अस्पताल भर्ना हुने दर बढाएको छ ।
तथ्यांकहरु हेर्दा अगाडिको बीए वानको तुलनामा बीए टुका कारण अस्पताल भर्ना हुने दर भने कम नै पाइएको छ । तर जोखिममा रहेका व्यक्तिमा संक्रमण भएमा भने खतरा हुनसक्ने स्वास्थ्यविदहरुको चेतावनी दिएका छन् । ६५ बर्षभन्दा माथिका व्यक्ति बढी जोखिममा रहेको भन्दै फाइजर र मोडेर्नाले बढी उमेरका व्यक्तिलाई चौथो डोजको स्वीकृतिका लागि अमेरिकाको एफडीए समक्ष अनुरोध गरिसकेका छन् ।
हङकङ पछिल्लो भर्सन बीए टुका कारण गम्भिर लहरको चपेटामा छ । हङकङमा कोरोना संक्रमणबाट मृत्यु हुने दर विश्वमै बढी रहेको छ । तर अमेरिकामा भने हङकङमा जस्तो यो भर्सनले आक्रमण गर्ने अपेक्षा गरिएको छैन । हङकङले अमेरिकामा बनेको भ्याक्सिन नभई फरक प्रकारका मिश्रण भ्याक्सिनमा भर परेको छ । त्यहाँ चाइनिज भ्याक्सिनमा बढी भर परिएको छ ।
सीएनएनले विश्लेषण गरेको संघीय तथ्यांक अनुशार अमेरिकामा मात्र २ करोड ८० लाख बढी उमेरका व्यक्तिहरु कोरोना संक्रमणबाट सिकिस्त हुने जोखिममा रहेका छन् । उनीहरुले भ्याक्सिन नलगाएका कारण, आंशिक रुपमामात्र भ्याक्सिन लगाएका कारण वा भ्याक्सिनको दोश्रो वा तेश्रो डोज लगाएको ५ महिना नाघिसकेका कारण उच्च जोखिममा रहेका हुन् ।
पछिल्ला अध्ययनहरुले समय बित्दै गर्दा भ्याक्सिनको प्रभावकारिता घट्दै गएको पत्ता लगाएका छन् । दोश्रो डोज लगाएको ६ महिना नाघेपछि भ्याक्सिन ओमिक्रोन भेरियन्टबिरुद्ध १० प्रतिशतमात्र प्रभावकारी रहेको पाइएको छ ।
कोरोनाबिरुद्धको बुस्टर डोजले संरक्षणलाई पुनस्थार्पित गरिदिएको छ । तर ओमिक्रोनको संक्रमण रोक्न ४० देखि ५० प्रतिशतमात्र प्रभावकारी रहेकाले विज्ञहरुले दीर्घकालिन संरक्षणबारे प्रश्न उठाएका छन् ।