अमेरिकामा १८ सय डलरको चेक दावी गर्ने अन्तिम मिति मे १७ सम्ममात्र
प्रकाशित मिति : बैशाख ४, २०८१ मंगलबार
कोरोना महामारीको समयमा सन् २०२० मा तपाईले कम्तीमा १८ सय डलरको राहत चेक पाउन छुटाउनुभएको थियो ? यदि छुटाउनुभएको थियो भने उक्त रकम दावी गर्ने अन्तिम मिति मे १७ सम्ममात्र रहेको आईआरएसले जानकारी दिएको छ । आईआरएसले सन् २०२० मा कोरोना महामारीको राहत चेक पाउन छुटाएकाहरु रिकभरी रिबेट क्रेडिटको हकदार हुन सक्नेभन्दै उनीहरुलाई ट्याक्स फाइल गर्न स्मरण गराउनुका साथै रकम दाबी गर्न समय सकिन लागेको जानकारी दिएको छ ।
२०२० मा ट्याक्स रिटर्न फाइल नगरेका कारण उक्त क्रेडिट नपाएकाहरुका लागि कानूनी समय सीमा मे १७, २०२४ हो। रिकभरी रिबेट क्रेडिट भनेको २०२० र २०२१ मा वितरित एक वा बढी राहत चेक प्राप्त नगर्ने व्यक्तिहरूको लागि रिफण्ड हुने क्रेडिट हो । योग्य करदाताहरूले रिकभरी रिबेट क्रेडिट दाबी गर्न पहिले कर रिटर्न फाइल गर्नुपर्छ। २०२० को राहत चेकका लागि दावी गर्ने अवधि मे १७ सम्म भएपनि २०२१ को राहत चेकका लागि दावी गर्ने अवधि भने सन् २०२५ को अप्रिल १५ सम्म रहेको छ ।
Time is running out to claim your refund from 2020. File ASAP before the May 17 deadline to avoid your refund going unclaimed. Visit here: https://t.co/Em6ymhwoOC pic.twitter.com/jj2agDHbbt
— IRSnews (@IRSnews) April 16, 2024
२०२० को रिकभरी रिबेट क्रेडिटको रकम तपाईंको फाइलिङ स्थिति र २०२० मा तपाईंले योग्य आश्रितहरूको संख्यामा निर्भर गर्दछ। पहिलो चरणको राहत चेकमा एकल फाइल गर्नेहरुले १२ सय डलरसम्म, संयुक्त फाइल गर्ने विवाहित जोडीहरूले २४ सय डलरसम्म र हरेक योग्य आश्रितका लागि ५ सय डलरसम्म पाएका थिए । सन् २०२० कै दोश्रो चरणको राहच चेकमा एकल फाइल गर्नेहरुले ६ सय डलरसम्म, संयुक्त फाइल गर्ने विवाहित जोडीहरूले १२ सय डलरसम्म र हरेक योग्य आश्रितका लागि ६ सय डलरसम्म पाएका थिए । यही रकम दावी गर्नका लागि आईआरएसले स्मरण गराएको हो ।
रिफण्ड लिन बाँकी रहेका करदाताहरूले तीनबर्षभित्र ट्याक्स फाइल गरेको खण्डमा मात्र रिफण्ड रकम पाउन सक्छन् । २०२० ट्याक्स फाइलका लागि उक्त तीनबर्षको अवधि आगामी मे १७ मा समाप्त हुन्छ । किनभने उक्त करबर्षका लागि ट्याक्स फाइल गर्ने डेडलाइन सन् २०२१ को मे १७ सम्म थियो । कोरोना महामारीका कारण त्यतीबेला डेडलाइन नियमितको तुलनामा एकमहिना थप गरिएको थियो ।
आईआरएसले २०२० को लागि ट्याक्स रिटर्न फाइल नगरेका अन्य व्यक्तिहरूलाई उनीहरूको रेकर्ड जाँच गर्न स्मरण गराएको छ । किनभने तिनीहरूले सम्भावित रिफण्ड रकमलाई बेवास्ता गरिरहेका हुन सक्छन् जुन मे १७ पछि उपलब्ध हुनेछैन।
२०२० र २०२१ को रिकभरी रिबेट क्रेडिटको लागि योग्य हुन सामान्यतया सम्बन्धित वर्षमा अमेरिकी नागरिक वा अमेरिकी निवासी व्यक्ति हुनु आवश्यक छ । अर्को करदाताको आश्रित हुनु हुँदैन भने ट्याक्स फाइल गर्ने अन्तिम मिति अघि नै जारी गरिएको सोसल सेक्युरिटी नम्बर हुनु आवश्यक छ। थप रूपमा २०२० को रिकभरी रिबेट क्रेडिट २०२० वा पछि मृत्यु भएको व्यक्तिको लागि समेत दाबी गर्न सकिन्छ।
