न्युयोर्क सिटीमा अनलाइनबाट युवती भेट्न गएका युवालाई बन्धक बनाएर १ लाख डलर माग
प्रकाशित मिति : चैत्र २, २०७८ बुधबार
न्युयोर्क सिटीमा अनलाइनबाट युवती भेट्न गएका एक युवालाई बन्धक बनाएर १ लाख डलर फिरौती मागिएको छ । उक्त युवतीविरुद्ध हत्याको प्रयास गरेको अभियोगमा मुद्दा दायर गरिएको छ ।
२२ बर्षकी ती युवतीले अनलाइनमा च्याट गरेर २४ बर्षका एक युवालाई आफ्नो अपार्टमेन्टमा बोलाएकी थिइन् । ब्रोंक्समा रहेको अपार्टमेन्टमा आएका ती युवालाई बन्धक बनाएर उनका भाईसँग १ लाख डलर फिरौती मागिएको थियो ।
भ्यालेरी रोजारियो नामकी ती युवतीको अपार्टमेन्टमा पुगेका २४ बर्षका युवालाई तीनजना पुरुषहरु भित्र छिरेर कुटपिट गरेका थिए भने पेस्तोल समेत ताकेका थिए । त्यसपछि ती युवालाई नांगै बनाएर बाथटवमा बस्न लगाएका थिए ।
ती युवामाथि प्रज्जवलनशील पदार्थ खनाएर आगो समेत लगाइदिएको जनाइएको छ । युवती र पुरुषहरुको समुहले पीडित युवालाई घण्टौंसम्म यातना दिएको जनाइएको छ । युवालाई शरीरका विभिन्न भागमा चक्कु समेत हानिएको थियो ।
उनीहरुले पीडित युवाका भाईलाई भिडियो कल गरेर १ लाख डलर फिरौती मागेका थिए । युवतीले पीडित युवालाई इन्स्टाग्राममा देखेर शिकार बनाएको जनाइएको छ । ती युवाले इन्स्टाग्राममा आफ्नो पैसा देखाउने गरेका थिए ।
न्युयोर्क सिटीको प्रहरीले क्वीन्समा पार्क गरिराखेको एउटा गाडीमा एकजना आक्रमणकारीलाई भेट्टाउन सफल भएका थिए । पीडित युवालाई प्रहरीले गाडीको पछाडि कम्बलमा बेरेको अवस्थामा अचेत भेटाएको थियो । युवतीलाई त्यसपछिमात्र पक्राउ गरिएको थियो ।