अमेरिकी संसदमा जेलेन्स्कीको सम्बोधन: ‘हरेक दिन सेप्टेम्बर-११ जस्तो पीडा सहिरहेका छौँ’
प्रकाशित मिति : चैत्र २, २०७८ बुधबार
युक्रेनका राष्ट्रपति भोलोडिमिर जेलेन्स्कीले संयुक्त राज्य अमेरिका र यसका सहयोगीहरूलाई आफ्नो देशलाई रूसी हवाई आक्रमणबाट जोगाउन नो-फ्लाई जोन घोषणा गर्न भावपूर्ण अपील गरेका छन् । भिडिओ सम्बोधनका क्रममा युक्रेनी राष्ट्रपति जेलेन्स्कीले रुसी फौजको आक्रमणबीच आफ्नो देशले हरेक दिन सेप्टेम्बर-११ को जस्तो पीडा सहिरहेको बताए।
‘मेरो एउटा सपना छ, यी शब्दहरू आज तपाईंहरू प्रत्येकलाई थाहा छ म भन्न सक्छु। मलाई एउटा आवश्यकता छ, मलाई हाम्रो आकाशको रक्षा गर्नु छ। मलाई तपाईंको निर्णय र सोही अनुरूपको मद्दत पनि चाहिन्छ,’उनले अमेरिकी कङ्ग्रेसलाई भर्चुअल भाषणमा सो आग्रह गरेका हुन।
जेलेन्स्कीले बुधबार अमेरिकी कङ्ग्रेसलाई सम्बोधन गर्दा युक्रेनको विनाशकारी भिडियो समेत देखाएका छन् । भिडियोमा भग्नावशेष भवनहरू , बालबालिकाहरुको बिचल्ली , घाइते नागरिकहरूको कारुणिक दृष्य देखाइएको थियो । सो भिडियोको अन्तिम फ्रेममा नो-फ्लाई जोनको अपीलमा ‘आकाश बन्द गर्नुहोस्’ शब्दहरू देखाइएको थियो।