युक्रेनी राष्ट्रपति जेलेन्स्कीले अमेरिकी संसदमा सम्बोधन गर्दै, यस्ता छन् चासोका मुद्दा
प्रकाशित मिति : चैत्र २, २०७८ बुधबार
युक्रेनी राष्ट्रपति भोलोदिमिर जेलेन्स्कीले आज बुधबार अमेरिकी संसदमा सम्बोधन गर्दैछन् । न्युयोर्क समय अनुशार विहान ९ बजे सम्बोधन गर्ने कार्यक्रम रहेको छ । जेलेन्स्कीले युक्रेनबाटै भर्चुअल रुपमा सम्बोधन गर्नेछन् ।
पूर्वी युरोपियन देशका नेताले रसियन हस्तक्षेपविरुद्ध संघर्ष गरिरहेको बेला अमेरिकन सांसदहरुलाई सम्बोधन गर्ने घटनालाई दुलर्भ क्षणका रुपमा लिइएको छ । अमेरिकी राष्ट्रपति जो बाइडेनले युक्रेनलाई १३ दशमलव ६ बिलियन डलर सहायता समेटिएको बृहत खर्च विधयेकमा हस्ताक्षर गरेको भोलिपल्ट यो सम्बोधन हुन लागेको हो ।
सम्बोधनका क्रममा जेलेन्सीले थप हतियारका लागि आव्हान गर्ने अपेक्षा गरिएको छ । त्यस्तै नो फ्लाइ जोन जस्ता कदमहरूको लागि आव्हान गर्ने पनि अपेक्षा गरिएको छ । उनले लडाकू जेटको सहायताका लागि आव्हान गर्ने सम्भावना रहेको छ, जुन यस अगाडि बाइडेनले अस्वीकार गरेका थिए ।
युक्रेनका नेताहरुले शोभियत निर्मित हतियारहरु आफ्नो देशलाई प्रदान गर्न अमेरिकासमक्ष आग्रह गर्दै आएका छन् । त्यस्तै एमआईजी लडाकू जेट र एस ३०० मिसाइल प्रणाली प्रदान गर्न समेत अमेरिका समक्ष आग्रह गर्दै आएका छन् । तर अमेरिकाले त्यस्ता हतियार प्रणाली युक्रेनलाई सहयोग गरेको छैन ।
बुधबारको सम्बोधन अगाडि अमेरिकाका रिपब्लिकन सांसदहरुले बाइडेन प्रशासनलाई पत्र लेख्दै युक्रेनलाई शोभियत र रसिया निर्मित हतियार प्रणाली सहायता गर्न आव्हान गरेका छन् । आजको सम्बोधनमा जेलेन्स्कीले घरमा बसेर टेलिभिजन हेर्न अमेरिकनहरु र अमेरिकी सांसदहरुलाई विशेष अनुरोधका लागि समय उपयोग गर्ने अपेक्षा गरिएको छ ।
जेलेन्स्कीले अमेरिकी संसदलाई रसियाबिरुद्ध कडा प्रतिबन्ध लगाउनका लागि आव्हान गर्ने सम्भावना समेत रहेको अमेरिकी संचारमाध्यमहरुले जनाएका छन् । किनभने बाइडेनसँगको पछिल्लो कुराकानीमा उनले रसियाबिरुद्ध थप प्रतिबन्धको अनुरोध गरेका थिए ।
त्यस्तै युक्रेनका शरणार्थीहरु स्वीकार गर्नका लागि पनि जेलेन्स्कीले आग्रह गर्नसक्ने सम्भावना रहेको छ । किनभने रसियन हस्तक्षेप सुरु भएपछि फेबु्रअरी २४ पछिमात्र ३० लाखभन्दा धेरैले युक्रेन छाडेका छन् । पोल्याण्डमा मात्र १८ लाखभन्दा धेरै युक्रेनीहरु प्रवेश गरेका छन् भने अमेरिकी विदेशमन्त्रीले युक्रेनी सरणार्थीहरुका लागि मंगलबार १८६ मिलियन डलरको थप मानवीय सहायताको घोषणा गरेका छन् ।