अमेरिकामा पेट्रोलियमको मूल्य नाघ्यो प्रति ग्यालेन ४ डलर, रसियन तेलमा प्रतिबन्धबारे विचार गरिदै
प्रकाशित मिति : फाल्गुन २२, २०७८ आईतबार
अमेरिकामा पेट्रोलियम पदार्थको मूल्य प्रति ग्यालेन ४ डलर नाघेको छ । आइतबार सन् २००८ यताका सबै रेकर्डहरु तोड्दै अमेरिकामा पेट्रोलियमको राष्ट्रिय औषत मूल्य ४ डलर प्रति ग्यालेन नाघेको हो । अमेरिकाका केही राज्यहरुमा प्रति ग्यालेन ५ डलर छिट्टै पुग्ने अनुमान गरिएको छ ।
सन् २००८ को जुलाईमा अमेरिकामा पेट्रोलियम पदार्थको मूल्य इतिहासमै सबैभन्दा धेरै प्रति ग्यालेन ४ डलर ११ सेन्टस नाघेको थियो । मुद्रास्फीतिका कारण सन् २००८ मा मूल्यबृद्धि भएको हो, जुन अहिलेको हिसाब गर्दा ५ डलर २५ सेन्टस बराबर हो ।
युक्रेनमाथि रसियन हस्तक्षेपले विश्वब्यापी उर्जा बजारमा समेत प्रभाव पारेकाले पछिल्लो मूल्यबृद्धिमा योगदान दिएको छ । किनभने विश्वको तेल बजारमा रसियाले १० प्रतिशत प्रदान गर्छ भने युरोपियन युनियनको एक तिहाई भन्दा धेरै प्राकृतिक ग्यासपनि रसियाले नै प्रदान गर्छ ।
पछिल्लो अवस्थासँगै केही प्रशोधक र ब्यापारीहरुले रसियाबाट कच्चा तेल किन्न बन्द गरेका छन् । ढुवानीमा ठूलो छुट प्रदान गर्दा पनि रसियासँग ब्यापार गर्दा प्रतिबन्धहरुको सामना गर्नुपर्ने त्रासले प्रशोधक, ब्यापारी, ढुवानीकर्ता र बैंकहरु पछाडि हटिरहेका छन् ।
युक्रेनका नेताहरुले पनि विश्वका देशहरुलाई रसियन तेल नकिन्न आव्हान गरिरहेका छन् । अमेरिकी राजनीतिज्ञले पनि उक्त आव्हानको समर्थन गरेका छन् । कच्चा तेलको मूल्य शुक्रबार प्रति ब्यारेल ११८ डलर पुगेको थियो । जबकी डिसेम्बरको सुरुतिर ६५ डलर प्रति ब्यारलमात्र रहेको थियो । आइतबार प्रति ब्यारेल १३० नाघिसकेको छ ।
अमेरिकी विदेशमन्त्री एन्टोनी ब्लींकेनले अमेरिकाले रसियन तेलमाथि प्रतिबन्ध लगाउनेबारे विचार गरिरहेको बताएका छन् । तर यो युरोपियन र नेटोको समन्वयमा हुने उनको भनाई छ । आंशिक रुपमा आपूर्ति र मागमा आएको उतारचढावका कारण महामारीको बेलादेखि नै अमेरिकामा पेट्रोलियम पदार्थको मूल्यबृद्धि हुन थालेको हो ।