अमेरिकामा ठगको निशानामा साना व्यवसाय, कतै यस्तो इमेल त आएन ?
प्रकाशित मिति : माघ २२, २०७८ शनिबार
अमेरिकामा ठगहरुले आफ्नो निशानामा साना व्यवसायलाई पारिरहेका छन् । त्यसका लागि उनीहरुले नयाँ तरिका अपनाइरहेका छन् । उनीहरुले साना व्यवसायहरुलाई इमेलमा विभिन्न सामान अर्डर गरेको भन्दै रसिदहरु पठाउने गरेका छन् ।
यसरी आएका रसिदहरु तपाईले वेवास्ता गर्नुभयो भने त ठीक छ । तर तपाईले आत्तिएर त्यहाँ दिइएको नम्बरमा फोन गर्नुभयो वा दिइएको लिंकमा क्लीक भने तपाई ठगको फन्दामा पर्न सक्नुहुनेछ । ठगहरुले पनि यही आशाका साथ तपाईलाई इमेल गरेका हुन्छन् कि तपाईले उनीहरुलाई फोन गरेर आफ्ना व्यक्तिगत विवरणहरु दिनुहोस् ।
फोनमा ठगहरुले क्रेडिट कार्ड नम्बर लगायतका विवरणहरु माग्न सक्छन् । कतिपयले तपाईको पेमेन्ट प्रकृयामा लगिएको भन्दै इन्भोइस पठाउने समेत गर्छन् । यदि त्यसलाई रोक्ने हो भने फोन गर्न भन्दै उनीहरुले जाल थापेका हुन्छन् । तर त्यस्ता ठगले गरेका इमेल वेवास्ता गर्नुपर्छ भने दिइएको नम्बरमा पनि फोन गर्नुहुँदैन ।
यदि तपाईले अर्डर नगरेको सामानको इन्भोइस वा रसिद प्राप्त गर्नुभयो भने तपाईले यसबारे चनाखो हुनुपर्छ । तपाईले रकम गए नगएको सुनिश्चित गर्न आफ्नो बैंक एकाउन्ट चेक गर्नुपर्छ । कतिपय व्यवसायीहरुले सामान अर्डर गरे नगरेको विर्सनसक्ने अनुमान गर्दै ठगहरुले उनीहरुलाई निशाना बनाइरहेका छन् ।
यदि तपाईले त्यस्ता इमेलहरु प्राप्त गर्नुभयो भने फेडरल ट्रेड कमिशनमा रिपोर्ट गर्नुपर्छ । त्यसका लागि यहाँ क्लीक गर्नुहोला ।