अमेरिकामा २१ राज्य समेटेर अर्को हिमआँधी आउँदै, कोलोराडोदेखि मैनसम्म ९० मिलियन प्रभावित
अमेरिकामा एकसाताभन्दा छोटो अवधिमा अर्को हिमआँधी आउने मौषमविदहरुले चेतावनी दिएका छन् । अमेरिकाका २१ वटा राज्यहरु हिमपात र खतरनाक चिसोको सामना गर्न तयारी अवस्थामा रहेका छन् ।
कोलोराडोदेखि मैनसम्म झण्डै २ हजार माइलमा ९० मिलियन मान्छे खराब मौषमबाट प्रभावित हुने जनाइएको छ । सबैभन्दा ठूलो प्रभाव दक्षिणी क्षेत्रमा पर्ने अनुमान गरिएको छ । त्यहाँ बरफसहितको आँधी आउने अनुमान गरिएको छ ।
खतरनाक चिसो तापक्रमका बीच टेक्सासको डलास र टेनेसीको मेम्फिसमा सडकमा बरफ जम्ने र कैयन स्थानमा विद्युत आपूर्तिमा अवरोध आउनसक्ने जनाइएको छ । मध्यपश्चिम क्षेत्रमा एक फुटसम्म हिमपातको अनुमान गरिएको छ भने कतिपय स्थानमा एकसयबर्षकै सबैभन्दा भारी हिमपात हुनसक्ने जनाइएको छ ।
कोलाराडोमा मंगलबार हिमआँधी आउने अनुमान गरिएको छ । मध्यपश्चिम क्षेत्रमा मंगलबारदेखि बुधबारसम्म हिमपात हुने र कतिपय स्थानमा १५ देखि २० इन्चसम्म हिमपात हुने मौषमविदहरुको अनुमान छ । मध्यपश्चिम क्षेत्रमा मंगलबारदेखि बुधबारसम्म एक चरण र बिहिबार अर्को चरण मौषम खराब हुने जनाइएको छ ।
मंगलबार र बुधबार शिकागोमा ८ देखि १२ इन्चसम्म हिमपात अनुमान गरिएको छ । बिहिबार मध्यपश्चिम क्षेत्रबाटै गुज्रने खराब मौषमले कतिपय क्षेत्रमा ६ इन्चसम्म हिमपात गराउनेछ । इन्डियानाको फोर्ट वायनमा १८ इन्चसम्म हिमपातको अनुमान गरिएको छ । यदि त्यसो भएमा सन् १९०० यताकै भारी हिमपात हुनेछ ।
डलासदेखि मेम्फिससम्म बुधबार बेलुकादेखि पानी पर्न सुरु गर्नेछ । बिहिबार पानीका साथमा बरफ पनि पर्नेछ । डलास फोर्ट वर्थ क्षेत्रमा दिइएको मौषम चेतावनीमा चौथाई इन्चसम्म बाटोमा बरफ जम्ने अनुमान गरिएको छ ।
बुधबारका लागि तय भएका १ हजारभन्दा बढी उडानहरु रद्द भइसकेका छन् । न्युयोर्कमा शुक्रबार अत्याधिक चिसो हुने र शनिबार घाम लागेपनि न्युयोर्कको तापक्रम अत्यन्तै चिसो रहनेछ । शुक्रबार हिमपात समेत हुनसक्ने अनुमान गरिएको छ ।
