Follow @khasokhasmag

महामारीमा एकबर्ष बढी अमेरिकाबाहिर रोकिएका ग्रिनकार्डवाहक कसरी सिधै अमेरिका आउने?


प्रकाशित मिति : माघ ८, २०७८ शनिबार

कोरोना महामारीका कारण कतिपय व्यक्ति एकबर्षभन्दा बढी अमेरिकाबाहिर रोकिनुपरेको छ । यो अवस्थाप्रति अमेरिकी सरकारका एजेन्सीहरु सचेत रहेका छन् र यसको व्यवहारिक पक्षबारे समेत जानकार रहेका छन् । एकबर्षभन्दा लामो समय अमेरिकाबाहिर बसेकाहरुले सामान्यतया रिटर्निङ रेसिडेन्ट भिसाका लागि आवेदन दिनुपर्ने भएतापनि यस्तो भिसा नलिएकाहरुलाई समेत विमान चढ्न युएस कस्टम एण्ड बोर्डर प्रोटेक्सनले अनुमति दिएको छ ।

अर्थात् कोरोना महामारीका कारण एकबर्षभन्दा लामो समय अमेरिकाबाहिर बस्नुपरेका ग्रिनकार्डवाहकको १० बर्षे ग्रिनकार्ड एक्सपायर भएको छैन भने त्यस्ता व्यक्तिलाई विमान चढाउन सीबीपीले एयरलाइन्सहरुलाई निर्देशिका जारी गरेको थियो । जस अनुशार अमेरिकाबाहिर बसेको एकबर्ष नाघेको भएतापनि यदि त्यस्ता यात्रुसँग एक्सपायर नभएको ग्रिनकार्ड छ भने एयरलाइन्सले उनीहरुलाई रिटर्निङ रेसिडेन्ट भिसा, रिइन्ट्री परमिट वा अन्य कागजात नलिएको भएतापनि विमान चढाउनुपर्छ ।

यसरी अमेरिकाबाहिर गएर एकबर्षभन्दा बढी समय बसेर फर्कने ग्रिनकार्डवाहकलाई कोरोना महामारीमा विमानस्थलबाट फर्काइएका घटना अत्यन्तै दुर्लभ रहेको कानून व्यवसायी केशवराज सेडाईले बताउनुभएको छ । दूतावासबाट रिटर्निङ रेसिडेन्ट भिसा अस्वीकार भएका कैयन नेपालीहरुले आफूहरु एक्सापायर नभएको ग्रिनकार्डमा अमेरिका आउँदा एकबर्ष नाघेको भएतापनि विमानस्थलमा अमेरिका प्रवेशमा कुनै अवरोध नआएको अनुभव खसोखासलाई सुनाएका छन् ।

यदि अमेरिकाबाहिर बसेको एकबर्ष भन्दा लामो समय भएको छ भने त्यस्ता ग्रिनकार्डवाहकलाई अमेरिकाबाहिर लामो समय बस्नुपर्नाको कारणहरु सीबीपी अधिकारीले सोध्न सक्छन् । यदि कोरोनाको कारणले अमेरिकाबाहिर रोकिनुपरेको हो भने स्वास्थ्य सम्बन्धि कागजातहरु भएको खण्डमा त्यस्ता प्रमाणहरु बोकेर ल्याउन कानून व्यवसायी सेडाईले सुझाव दिनुभएको छ ।

कुनै स्वास्थ्य समस्या भएका व्यक्तिलाई डाक्टरले कोरोना महामारीका बेलामा सार्वजनिक यातायातमा नचढ्न सुझाव दिएको छ भने त्यस्ता कागजातहरु साथमा राख्न समेत कानून व्यवसायीको सुझाव छ । साथै अमेरिकामा ट्याक्स फाइल गरेका वा अमेरिकासँगका अन्य सम्बन्धका कागजातहरु पनि साथमा राख्न सुझाव दिइएको छ । विदेशमा रहेको बेला कोरोना संक्रमित भएको भएमा पनि त्यस्ता कागजातहरु साथमा राख्न सुझाव दिइएको छ ।

सीबीपीको पछिल्लो गाइडलाइन अनुशार यदि ग्रिनकार्ड एक्सपायर भइसकेको छ भने पनि त्यस्ता व्यक्तिलाई एयरलाइन्सले विमान चढ्न अनुमति दिन सक्छन् । तर त्यस्तो ग्रिनकार्ड १० बर्षका लागि जारी भएको ग्रिनकार्ड हुनुपर्छ । यदि कुनै शंका भएको खण्डमा एयरलाइन्सले सीबीपीको क्षेत्रीय करिअर सम्बन्ध समुह आरसीएलजीमा सम्पर्क गर्न सक्नेछन् । आरसीएलजीले यात्रु वा वकिलसँग सम्पर्क नगरी एयरलाइन्ससँगमात्र सम्पर्क गर्छ ।

सामान्यतया ग्रिनकार्ड एक्सपायर भएको अवस्थामा ग्रिनकार्डवाहकले दूतावासमा ट्राभल फोइलका लागि आवेदन दिनुपर्छ । त्यस्तो ट्राभल फोइल प्राप्त भइसकेपछि उनीहरु अमेरिका आउन सक्छन् । तर कोरोना महामारीमा भने एक्सपायर भएको ग्रिनकार्डमा समेत अमेरिका आउन अनुमति दिइएको छ भने हराएको वा चोरी भएको ग्रिनकार्डका सन्दर्भमा ट्राभल फोइल लिनुपर्छ ।

तपाईलाई एयरलाइन्सले विमान चढ्न अनुमति दिएपछि अर्को चुनौति अमेरिका आइसकेपछि विमानस्थलमा सामना गर्नुपर्छ । तपाईलाई अमेरिका प्रवेशका लागि अनुमति दिने वा नदिने निर्णय विमानस्थलमा सीबीपी अधिकारीहरुले गर्नेछन् । तर कोरोना महामारीका कारण भएको ढिलाईमा उनीहरुले प्राय अमेरिका प्रवेशको अनुमति दिने गरेका छन् ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com