Follow @khasokhasmag

न्युयोर्कमा फोनबाट ठगको फन्दामा परे उबर चालक नेपाली, क्षणभरमै एकाउन्टको सबै रकम गायब


प्रकाशित मिति : माघ ५, २०७८ बुधबार

अमेरिकाको न्युयोर्कमा एकजना उबर चालक नेपाली फोनबाट ठगको फन्दामा परेका छन् । ठगको फन्दामा पर्दा क्षणभरमै उबर एकाउन्टमा रहेको सबै रकम गुमाउनु परेको उनले नाम उल्लेख नगर्ने शर्तमा खसोखासलाई जानकारी दिए ।

सोमबार विहान उबर चलाइरहेको बेला एउटा फोनकल आएको र फोन उठाउँदा उक्त व्यक्तिले उबरबाट फोन गरेको बताएको उनले जानकारी दिए । गाडी चलाउँदा ग्राहकबाट मास्क नलगाएको रिपोर्ट आएको र परिचय प्रमाणिकरण नगरे उबरको चालक एकाउन्ट बन्द गरिदिने बताएपछि आफूले उबरबाटै फोन आएको ठानेर सबै विवरण दिएको ती नेपालीले बताए ।

ठगले रकम लगेपछिको स्टेटमेन्ट

फोनमा एकाउन्ट अपडेट गर्ने भन्दै बैंकको विवरण मागेको समेत उनले बताए । आफ्नो एकाउन्टबाट ठगले एकसाताको सबै आम्दानीको रकम लगेको उनले बताए ।

उनले भने – ‘मैले उबरबाटै फोन आएको होला भन्ने ठानेर उसले मागेका सबै विवरणहरु दिएँ । तर एकैछिनमा उबरको एकाउन्टबाट सबै रकम गायब भयो । त्यसपछि मैले आफू ठगको फन्दामा परेको ठगिएको थाहा पाएँ ।’

ठगले परिवर्तन गरिदिएको नम्बर

आफ्नो उबरको एकाउन्टबाट १८७६ डलर गुमाउनु परेको उनले बताए । ठगले आफ्नो उबर एकाउन्टमा बैंक विवरण, फोन नम्बर लगायतका विवरणहरु पनि परिवर्तन गरिदिएकाले आफूले त्यसपछि उबर चलाउन नसकेको उनले बताए । उबरमा सम्पर्क गर्दा अहिलेसम्म कुनै रेस्पोन्स नआएको उनले बताए ।

ठगले क्यासआउट गर्न प्रयोग गरेको एकाउन्ट

ठगले उनको एकाउन्टमा अन्तिम ४ डिजिट २०१५ रहेको आगामी सन् २०२५ को जनवरीमा एक्सपायर हुने डेबिट कार्ड राखेको छ । त्यस्तै फोन नम्बर पनि परिवर्तन गरेर २५१ ८७३ ६७८१ राखेको ती नेपालीले जानकारी दिए । न्युयोर्कको क्वीन्समा बस्दै आएका ती उबर चालकले भने – ‘म त यसरी ठगिएँ । अरु यसरी ठगिनबाट बच्न सावधान रहनुहोला ।’

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com