भिसा परिवर्तन र थपका लागि दिइएका अनलाइन आवेदनमा हुलाकमार्फत बायोमेट्रिक सुचना नपठाउने
प्रकाशित मिति : पुस १९, २०७८ सोमबार
भिजिटर, विद्यार्थी लगायतका गैर आप्रवासी भिसाको स्टाटस परिवर्तन र थपका लागि दिइएका आई ५३९ का अनलाइन आवेदनमा युएससीआईएसले हुलाकमार्फत बायोमेट्रिक सुचना नपठाउने भएको छ । यस अगाडि त्यस्ता बायोमेट्रिक अप्वाइन्टमेन्टको सुचना युएससीआईएसले हुलाकबाट समेत पठाउँदै आएको थियो ।
अब अनलाइनमार्फत दिइएका त्यस्ता आवेदनमा बायोमेट्रिकको सुचना पनि अनलाइन एकाउन्टमा नै गएर हेर्न सकिनेछ । बायोमेट्रिक अप्वाइन्टमेन्ट तय भइसकेपछि अनलाइन एकाउन्टमा डकुमेन्ट सेक्सनमा गएर बायोमेट्रिक अप्वाइन्टमेन्टको सुचना हेर्न सकिनेछ । उक्त सुचनामा कुन मिति र समयमा कुन स्थानमा गएर बायोमेट्रिक दिने भन्ने उल्लेख हुनेछ ।
बायोमेट्रिक दिने आवेदन सपोर्ट सेन्टरमा जाँदा भने उक्त सुचना प्रिन्ट गरेर नै लैजानुपर्नेछ । युएससीआईएसलाई डिजिटल बनाउने क्रममा अनलाइनमार्फत फाइल गरिएका आई ५३९ आवेदनका सन्दर्भमा बायोमेट्रिक पनि अनलाइनमामात्र उपलब्ध गराउने व्यवस्था गरिएको युएससीआईएसले जनाएको छ ।
अनलाइनमार्फत गरिएका आई ५३९ आवेदनमा अनलाइनमा नै आवेदनको अवस्था हेर्न सकिन्छ भने थप कागजातको माग भएको खण्डमा त्यस्ता कागजात वा प्रमाण पनि अनलाइनमार्फत नै पेश गर्न सकिन्छ । त्यस्तै सम्पर्क सम्बन्धि विवरणहरु पनि अनलाइनमार्फत नै सहजै परिवर्तन गर्न सकिन्छ ।
युएससीआईएसका महत्वपूर्ण सुचनाहरु नछुटाउन नियमित रुपमा अनलाइन एकाउन्ट चेक गर्न सुझाव दिइएको छ । नोटिफिकेशनका लागि साइनअप गरेको खण्डमा हरेक अपडेटका लागि इमेलमा समेत सुचना प्राप्त हुनेछ ।
यदि बायोमेट्रिक अप्वाइन्टमेन्टको मिति पछाडि सार्न परेमा युएससीआईएसको सम्पर्क केन्द्र ८०० ३७५ ५२८३ मा फोन गर्न सकिनेछ । तर सुरुको अप्वाइन्टमेन्टको समय र मिति अगाडि नै फोन गरेर नयाँ अप्वाइन्टमेन्ट तय गर्न आवश्यक छ । त्यस्तै अप्वाइन्टमेन्ट सार्नुपर्नाको उचित कारण समेत बताउन आवश्यक हुन्छ ।
यदि समयमै नयाँ अप्वाइन्टमेन्ट तय गर्नका लागि सम्पर्क नसकेमा वा नयाँ अप्वाइन्टमेन्टका लागि उचित कारण पेश गर्न नसकेमा युएससीआईएसले बायोमेट्रिकको नयाँ मिति नदिने सम्भावना रहन्छ । अप्वाइन्टमेन्टमा उपस्थीत नभएमा वा नयाँ मिति तय नगरेमा युएससीआईएसले आवेदन त्यागेको ठहर गर्दै अस्वीकार गर्न सक्नेछ ।