नेपाली पहिचान, पर्यटन र ब्यापार प्रबर्द्धनमा थप जिम्मेवारीबोध भएको छ : ऋषी ढकाल, अवैतनिक महावाणिज्यदूत
प्रकाशित मिति : जेष्ठ २५, २०७४ बिहीबार
ऋषी ढकाल, अवैतनिक महावाणिज्यदूत
अमेरिकाको क्यालिफोर्निया निवासी ऋषी ढकाल हालै नेपाल सरकारका तर्फबाट क्यालिफोर्नियाको सान डिएगो क्षेत्रका लागि अवैतनिक महावाणिज्यदूत हुनुभएको छ । उहाँ सोही क्षेत्रका लागि सन् २०१३ देखि अवैतनिक वाणिज्यदूत हुनुहुन्थ्यो । अवैतनिक महावाणिज्यदूतमा बढुवा हुनुभएका ढकालसँगको कुराकानी ।
सर्बप्रथम अवैतनिक महावाणिज्यदूतमा बढुवा हुनुभएकोमा बधाई छ । वाणिज्यदूत हुँदा कस्तो भूमिका खेलेका कारण महावाणिज्यदूत हुनुभयो ?
नेपाल सरकार र अमेरिकामा रहेको नेपाली दूतावासले दिएको जिम्मेवारीलाई मैले पूर्णरुपमा आफ्नो क्षमताले भ्याएसम्म नेपाली जनताका इस्युलाई सम्बोधन गर्ने र उनीहरुका समस्याहरुलाई समाधान गर्ने, नेपाली ब्यापार व्यवसाय तथा नेपाली पहिचानको प्रबद्र्धन गर्ने क्रममा नेपाल चिनाउने काम एवं नेपाली जनताको सेवामा हाजिर हुने काम गरें । जुन कुरा नेपाल सरकारले पनि मूल्यांकन गरेको छ । वाणिज्यदूतमा नियुक्त भइसकेपछि नेपालबाहिर निर्यात हुने नेपाली लत्ताकपडाको सन्दर्भमा सबैभन्दा धेरै गार्मेन्ट निर्यात गरेबापत मलाई राष्ट्रपतिबाट सम्मान उपलब्ध गराइएको थियो ।
महावाणिज्यदूतमा नियुक्ती पाउँदा कस्तो अनुभव भइरहेको छ ?
अहिले मेरो दायित्व, भूमिका र जिम्मेबारी अझ बढेको महसुस गरेको छु । नेपाली जनता, नेपाल सरकार र अमेरिकी सरकारको बीचमा बसेर निर्वाह गर्नुपर्ने भूमिकामा मेरो दायित्वको दायरा बढेको छ । पहिलेको भन्दा पनि सफल रुपमा अगाडि बढाउने र थप जिम्मेबारीबोधका साथ लाग्नेछु ।
अबको दिनमा अमेरिकामा रहेका नेपालीलाई प्रत्यक्ष अनुभव हुने गरी कुनै कामको योजना छ ?
देशको प्रतिनिधित्व गर्ने क्रममा प्रवासमा रहेका हरेक नेपालीहरुको भूमिका उत्तिकै रहन्छ । आफ्नो मातृभूमीको सेवा लगायतका कार्यमा र समाजलाई नेतृत्व गर्ने साथीहरुले जसरी नेपाल सरकार, नेपाली दूतावास र वाणिज्यदूतावासको भूमिकामा नेपाल चिनाउने क्रममा उत्सव, कार्यक्रम र परेडहरु गरेर अगाडि बढिरहनुभएको छ, उहाँहरुसँग हातेमालो गर्दै अगाडि बढ्न सकिन्छ । ६६ बाट बढेर अहिले अमेरिकामा कर नलाग्ने ७७ प्रकारका नेपालमा उत्पादित सामानलाई अमेरिकामा निर्यात गर्नमा ब्यापार व्यवसायसँग सम्बन्धित साथीहरुलाई सहयोग गर्दै अमेरिकामा खुद्रा, थोक बिक्री गरेर आर्थिक हिसाबले सहयोग गर्न सकिन्छ । नेपालमा पनि थप रोजगारी दिलाउन सकिन्छ ।
हामीले अहिले ७७ प्रकारका सामान अमेरिका ल्याउदा कर नलाग्ने व्यवस्था गर्न सक्यौं, त्यस्ता सामानको उत्पादन क्षमता बढाउनेमा व्यवसायीहरुलाई आग्रह गर्नेछौं । त्यही अनुशारको काम गर्ने प्रणालीको विकाशका लागि मैले मेरो क्षमताले भ्याएसम्म काम गर्नेछु । मैले हिजोका दिनमा पनि गरेको छु र आगामी दिनमा पनि गर्नेछु । स्थानीय रुपमा अमेरिकामा रहनुभएका नेपालीहरुलाई आफ्नो आफ्नो ठाउबाट आफ्नो पहिचानको प्रबद्र्धन गर्ने क्रममा स्थानीय सरकार, सिटी काउन्सिल, च्याम्बर अफ कमर्श लगायत विभिन्न संघ संस्थासँग एकीकरण गर्ने प्रकृयाका सहयोग गर्नेछौं । अमेरिकामा रहेका नेपालीको ज्ञानलाई मातृभूमीमा लैजान हामी सम्बन्धित दक्ष व्यक्ति र संघसंस्थालाई अनुरोध गर्नेछौं । यही सन्दर्भमा महावाणिज्यदूतावासको भूमिका रहिरहनेछ ।
तपाई वाणिज्यदूतका रुपमा रहँदा र महावाणिज्यदूत भइसकेपछिको भूमिकामा के फरक हुनेछ ?
भूमिकाका रुपमा वाणिज्यदूत र महावाणिज्यदूतको भूमिका उस्तै हो । महावाणिज्यदूत एक स्टेप प्रोमोसन हो । हामीले दूतावास अन्तरगत नै काम गर्ने भएकाले दूतावासको निर्देशनमा रहने र नेपाली पहिचानलाई चिनाउने, व्यवपार व्यवसाय बढाउने, नेपालीहरुको आर्थिक समृद्धिका लागि हुनसक्ने कार्यका लागि दूतावाससँग मिलेर काम गर्नेछौं । स्थानीय स्तरमा पनि स्थानीय सरकारसँग समन्वय गर्दै अगाडि बढ्नेछौं ।
तत्कालिन राष्ट्रपतिबाट सम्मान ग्रहण गर्दै ढकाल ।