बाल्यकालमा अमेरिका आएपछि डाकाले समेटेर देशनिकाला हुन बचेका नेपाली ५०
प्रकाशित मिति : पुस १, २०७८ बिहीबार
अमेरिकी सरकारको युएससीआईएसले बाल्यकालमा अमेरिका आएर अध्यागमन स्टाटस गुमाएपछि डाकाले समेटेका नेपालीहरुको संख्या सार्वजनिक गरेको छ । बुधबार सार्वजनिक सेप्टेम्बरसम्मको तथ्यांक अनुशार डाकाले समेटेर देशनिकाला हुनबाट बचेका नेपालीहरुको संख्या ५० रहेको छ ।
यस अगाडि बाल्यकालमा अमेरिकामा छिरेर कागजपत्रविहिन भएकाहरुलाई अमेरिकामा बस्न र काम गर्न अनुमति दिने डिफर्ड एक्सन फर चाइल्डहुल अराइभल अर्थात् डाका कार्यक्रम अन्तरगत ६० जना नेपालीहरु संरक्षित रहेको तथ्यांक रहेको थियो । उनीहरु १६ बर्ष उमेर नपुग्दै अमेरिकामा आएका र सन् २००७ वा त्यो भन्दा अगाडि देखि अमेरिकामा लगातार बस्नै आएका तथा सन् २०१२ को जुनसम्म ३१ बर्ष ननाघेकाहरु हुन् ।
उनीहरुलाई बाबुआमाले सन् २००७ भन्दा अगाडि १६ बर्ष नपुग्दै विभिन्न भिसामा वा अन्य तरिकाबाट अमेरिकामा ल्याएका थिए । त्यसपछि उनीहरु अमेरिकामा कागजपत्रविहिन भएका थिए ।
बाल्यकालमा अमेरिका छिरेकाहरुलाई अमेरिकामा डिपोर्टेशनको डरविना बस्न र कामगर्न अनुमति प्रदान गर्ने यो कार्यक्रम सन् २०१२ मा तत्कालिन अमेरिकी राष्ट्रपति बराक ओबामाले ल्याएका थिए ।
अमेरिकामा डाकाले समेटेकाहरु ६ लाख ११ हजार ३० जना रहेका छन् । सबैभन्दा धेरै मेक्सिकोका ४ लाख ९३ हजार रहेका छन् भने दोश्रोमा एल साल्भाडोरका २३ हजार ५ सय ९० जना रहेका छन् । तेश्रोमा ग्वाटेमालाका १६ हजार ५० र चौथोमा होण्डुरसका १४ हजार ६ सय २० जना रहेका छन् ।