ओमिक्रोन: ‘भ्याक्सिन कम प्रभावकारी हुनसक्छ’ -मोडेर्ना सीईओ, ‘चक्कीले काम गर्छ’ -फाइजर सीईओ
प्रकाशित मिति : मंसिर १४, २०७८ मंगलबार
कोरोनाबिरुद्धको भ्याक्सिन निर्माता कम्पनी मोडेर्नाका सीईओले ओमिक्रोन भेरियन्टबिरुद्ध भ्याक्सिन कम प्रभावकारी हुनसक्ने चेतावनी दिएका छन् । विगतका कोरोनाका भेरियन्टमा जत्तिकै ओमिक्रोनमा पनि भ्याक्सिन प्रभावकारी हुने सम्भावना कम रहेको मोडेर्नाका सीईओ स्टीफन बन्सेलले बताएका छन् ।
प्रभावकारिता कति कम हुने भन्नेबारे अहिले नै बताउन नसकिने तर आफूले कुरा गरेका वैज्ञानिकहरुका भनाईमा आधारित भएर भन्दा प्रभावकारिता कम हुनसक्ने उनले चेतावनी दिएका हुन् । भ्याक्सिनको प्रभावकारितामा कम आएमा बिरामी हुने र अस्पताल भर्ना हुने दरमा बृद्धि हुनसक्ने अनुमानहरु गरिएको छ ।
प्रोटिन स्पाइकमा उच्च संख्यामा उत्परिवर्तनको अर्थ अहिलेको कोरोनाबिरुद्धको भ्याक्सिनमा संसोधन गर्नुपर्ने हुनसक्ने बन्सेलले बताएका छन् । यसअगाडि उनले ओमिक्रोन भेरियन्टबिरुद्धको भ्याक्सिन बजारमा ल्याउन केही महिना लाग्नसक्ने बताएका थिए । मोडेर्नाले जनवरीसम्म ओमिक्रोनबिरुद्ध काम गर्नसक्नेगरी भ्याक्सिन परिमाजर्न गर्नसक्ने बताएको थियो ।
यसैबीच फाइजरका सीईओले भने कोरोनाको उपचारका लागि बनाइएको चक्कीले ओमिक्रोन भेरियन्टबिरुद्धपनि काम गर्ने विश्वास व्यक्त गरेका छन् । ओमिक्रोन भेरियन्टबिरुद्ध भ्याक्सिन बनाउन सुरु गरिसकेको र एकसय दिनमा तयार हुने बताएको फाइजरले चक्कीले पनि काम गर्ने उच्च विश्वास व्यक्त गरेको हो ।
फाइजरले खाने चक्कीलाई प्रयोगको स्वीकृतिका लागि यसैमहिनाको सुरुमा एफडीएसमक्ष आवेदन दिएको थियो । क्लीनिकल परीक्षणमा १८ बर्षभन्दा माथिकाहरुमा फाइजरको खानेचक्की अस्पताल भर्ना हुने र मृत्युदर रोक्न ८९ प्रतिशत प्रभावकारी देखिएको थियो ।