२०२१ मा अमेरिकी अदालतबाट जम्मा १३७ नेपालीलाई एसाइलम, १४ बर्षमा सबैभन्दा कम
प्रकाशित मिति : कार्तिक २७, २०७८ शनिबार
आर्थिक बर्ष २०२१ मा अमेरिकी अध्यागमन अदालतबाट जम्मा १३७ जना नेपालीहरुको एसाइलम स्वीकृत गरिएको एक्जुकेटिभ अफिस फर इमिग्रेशन रिभ्युले जानकारी दिएको छ । गत आर्थिक बर्षमा विगतको १४ बर्षको इतिहासमा सबैभन्दा कम नेपालीहरुले अमेरिकी अदालतबाट एसाइलम पाएका छन् ।
निर्णय गरिएका नेपालीका कुल आवेदनहरुमध्ये कुल ५९ प्रतिशतको आवेदन स्वीकृत गरिएको छ भने १३ प्रतिशतको आवेदन अस्वीकृत गरिएको छ । अर्थात ३० जना नेपालीहरुको एसाइलम आवेदन अदालतबाट अस्वीकृत भएको छ । २८ प्रतिशत अर्थात् ६४ जनाको अरु नै निर्णय गरिएको थियो । आर्थिक बर्ष २०२१ मा कुल २३१ नेपालीका एसाइलम आवेदन हेरिएको छ ।
प्रशाशनिक रुपमा बन्द गरिएका आवेदनहरु यो संख्यामा समावेश गरिएको छैन । यो तथ्यांक सन् २०२० को अक्टोबर १ देखि सन् २०२१ को सेप्टेम्बर ३० सम्मको हो । यो तथ्यांकमा अध्यागमन अदालतमा नगइकनै युएससीआईएसबाट निर्णय लिइएका एसाइलमको विवरण पनि समावेश गरिएको छैन ।
कोरोना महामारीका कारण अध्यागमन अदालतहरु बन्द हुँदा थोरैमात्र एसाइलमका केसउपर कारवाही गरिएको छ । जसका कारण पनि आर्थिक बर्ष २०२१ मा कममात्र नेपालीहरुले एसाइलम पाउन सफल भएका छन् । कोरोना महामारीका कारण बन्द भएका अदालतहरु हिराशतमा नरहेका एसाइलम आवेदकका लागि गत जुलाईबाटमात्र पूर्णरुपमा संचालनमा आएका थिए ।
कोरोना महामारीका बाबजुत आर्थिक बर्ष २०२० मा भने अमेरिकी अदालतबाट ३२९ जना नेपालीहरुले एसाइलम पाउन सफल भएका थिए । २०१९ मा यो संख्या इतिहासमा नै अहिलेसम्मकै धेरै ६२८ रहेको थियो । २०१८ मा ४८४, २०१७ मा ३२०, २०१६ मा २९५, २०१५ मा २७७, २०१४ मा ३२८ नेपालीले अमेरिकी अदालतबाट एसाइलम पाए ।
आर्थिक बर्ष २०१३ मा ४११, २०१२ मा ४०८, २०११ मा ३२७, २०१० मा २३१, २००९ मा १७२ नेपालीहरुले अमेरिकी अदालतबाट एसाइलम पाए । आर्थिक बर्ष २००८ मा १५४ नेपालीहरुले अमेरिकी अदालतबाट एसाइलम पाए भने गत आर्थिक बर्षमा एसाइलम पाउने नेपालीहरुको संख्या यो भन्दा पनि कम भएको हो । सन् २००७ मा १३१, २००६ मा १६५, २००५ मा ८५, २००४ मा ९३, २००३ मा ५७, २००२ मा ३७ र २००१ म ३१ जना नेपालीहरुले अमेरिकी अदालतबाट एसाइलम पाएका थिए ।
सन् २००१ देखि अहिलेसम्म अमेरिकी अदालतबाट एसाइलम पाउने नेपालीहरुको संख्या ५ हजार १ सय ६ रहेको भने १९५६ जनाको एसाइलम अस्वीकृत भएको छ । ७७ जनाले अन्य प्रकारको अध्यागमन सुविधा पाएका छन् । यसमा युएससीआईएसबाट सिधै एसाइलम स्वीकृत हुनेको विवरण समावेश छैन । अहिले अमेरिकी अदालतमा ४ हजार ५२ जना नेपालीका एसाइलम आवेदनहरु पेन्डिंग अवस्थामा रहेका छन् ।