एनआरएनएको स्थगित सम्मेलन नोभेम्बर २० सम्म गर्ने ‘वातावरण मिलाउने’ निर्णय
प्रकाशित मिति : कार्तिक १, २०७८ सोमबार
एनआरएनए अध्यक्ष कुमार पन्त
एनआरएनएको स्थगित सम्मेलन नोभेम्बर २० सम्म गर्ने वातावरण मिलाउने निर्णय भएको छ । अध्यक्ष कुमार पन्तको अध्यक्षतामा बसेको बैठकले संघको १० औं कार्यसमितिको निर्वाचन तथा महाधिवेशन आगामी नोभेम्वर ३० भित्र गर्ने वातावरण मिलाउने निर्णय गरेको हो ।
एनआरएनए निर्वाचनलाई तोकिएको समयमा व्यवस्थित रुपमा सम्पन्न गर्न पराराष्ट्र मन्त्रालय लगायत बिभिन्न सरोकारहरुसंग छलफल गी महाधिवेशनको वातावरण तयार गर्न अध्यक्ष कुमार पन्तलाई जिम्मा दिने निर्णय भएको छ ।
बैठकले गैरआवासीय नेपाली संघको विधानको धारा १३ को उपधार २ बमोजिम वर्तमान कार्यसमितिको कार्यकाल ६ महिनाको लागि थप गर्ने निर्णय गरेको प्रवक्ता डि.बि. क्षेत्रीले जानकारी दिएका छन् ।
बैठकले संघको महाधिवेशन प्रतिनिधिहरुको सम्बन्धमा आएका गुनासाहरुलाई सम्बोधन गर्न संघका पूर्वअध्यक्षहरुसंगको परामर्शमा टिओआर सहित एक स्वतन्त्र समिति गठन गर्ने र सो समितिको सुझावको आधारमा आएका प्रतिनिधिहरुको नामावलीलाई निर्वाचन समितिमा पठाउने निर्णय समेत गरेको छ ।
गैरआवासीय नेपाली संघको महाधिवेशन प्रतिनिधिहरुका सम्बन्धमा आएका गुनासाहरुलाई सम्वोधन गर्न संघ सक्षम रहेको र संघको मुल्य, मान्यता र गरिमालाई उच्च राख्न छिटो भन्दा छिटो महाधिवेशन सम्पन्न गरि नेतृत्व हतान्तरण गर्न वर्तमान कार्यसमिति प्रतिबद्ध रहेको एनआरएनले जनाएको छ । एनआरएन कार्यसमितिले संघको महाधिवेशन सम्म संयमित हुन सबै पक्षप्रति आग्रह समेत गरेको छ ।