गुल्मीका विजय कुँवर सम्मिलित रिसर्चका लागि अमेरिकाको सरकारी फाउण्डेशनबाट २ लाख डलर
प्रकाशित मिति : भाद्र २२, २०७८ मंगलबार
अमेरिकाको जर्जिया निवासी गुल्मीका विजय कुँवर सम्मिलित रिसर्चका लागि अमेरिकाको सरकारी फाउण्डेशनले २ लाख डलरको फण्ड उपलब्ध गराउने भएको छ । रिसर्चका लागि कुँवरको टिमले अमेरिकाको नेशनल साइन्स फाउण्डेशनबाट फण्ड सुरक्षित गर्न सफल भएको हो ।
रिसर्च टिममा कुँवर सह संयोजकको भूमिकामा रहेका छन् । ‘जिवशास्त्रको पाठ्यक्रममा डाटा बिज्ञानको संयोजन’ शीर्षकको यो रिसर्चमा कुँवरले डाटा साइन्स र गणितमा रहेको आफ्नो विज्ञताको योगदान दिनेछन् ।
गुल्मीको तम्घासमा जन्मिएका कुँवरले फ्लोरिडा स्टेट युनिभर्सिटीबाट गणितमा पीएचडी गरेका हुन् । उनी हाल अल्बानी स्टेट युनिभर्सिटी जर्जियामा गणितमा सहायक प्राध्यापकका रुपमा कार्यरत रहेका छन् ।
फण्ड उपलब्ध गराउने नेशनल साइन्स फाउण्डेशन अमेरिकी सरकारको एक स्वतन्त्र निकाय हो । यो फाउण्डेशनले विज्ञान र इन्जिनियरिङमा गैर चिकित्सा क्षेत्रमा शिक्षा र शोधका लागि सहयोग गर्दै आएको छ । नेशनल साइन्स फाउण्डेशनको अधिकांश बजेट अमेरिकाको संघीय सरकारबाट प्राप्त हुने गरेको छ ।
नेशनल साइन्स फाउण्डेशनका निर्देशक र उप निर्देशकहरु अमेरिकी राष्ट्रपतिले नियुक्त गर्ने र सिनेटबाट स्वीकृत गर्ने प्रावधान रहेको छ । ७१ बर्ष पुरानो यो फाउण्डेशनको बार्षिक बजेट ८ बिलियन भन्दा धेरै रहेको छ ।