न्युयोर्कमा भएको आगलागीमा नेपाली रेष्टुरेण्ट बाजेको सेकुवासहितका व्यवसायमा क्षति


प्रकाशित मिति : श्रावण २८, २०७८ बिहीबार

न्युयोर्कको सन्नीसाइडमा बिहिबार भएको आगलागीमा सन्नीसाइडमा रहेको नेपाली रेष्टुरेण्ट बाजेको सेकुवासहितका व्यवसायहरुमा क्षति पुगेको छ । विहान ७ बजेर २० मिनेटमा आगलागी सुरु भएको जनाइएको छ ।

क्वीन्स ब्लुभर्ड र ४४ स्ट्रीटको कर्नरमा रहेको जापानिज ग्रोसरी स्टोर ताइवो फुड्सबाट आगलागी सुरु भएको थियो । आगलागी नियन्त्रणमा आउनुभन्दा अगाडि नै बाजेको सेकुवा लगायतका अन्य व्यवसायमा आगलागी फैलिएको थियो ।

आगलागीबाट ताइवो फुड्ससहित म्याड फर चिकेन, म्याड क्याफे र बाजेको सेकुवामा सबैभन्दा धेरै क्षति भएको छ । कोरोना महामारीका कारण संघर्ष गरिरहेका व्ययवसायहरुमा आगलागीबाट भएको क्षतिले थप नोक्सान गरेको छ ।

आगलागीपछि बाजेको सेकुवाले अब कम्तीमा एकमहिनासम्म रेष्टुरेण्ट खुल्ने अवस्था नरहेको भन्दै सामाजिक सञ्जालमा जनाएको छ ।

बाजेको सेकुवा न्युयोर्कमा रहेको चर्चित नेपाली रेष्टुरेण्ट हो । नेपालकै बाजेको सेकुवाको फ्रेन्चाइजका रुपमा संचालित यो रेष्टुरेण्टमा नेपाली परिकारहरुका लागि गैर नेपालीहरुसमेत आउने गर्छन् ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com