अमेरिका निवासी ओम दाहालको पहलमा सिराहा र सप्तरीका तीन विद्यालयलाई ६० कम्प्युटर सहयोग
प्रकाशित मिति : श्रावण २०, २०७८ बुधबार
अमेरिकाको इन्डियाना निवासी ओम दाहालको पहलमा संचालित अभियानबाट सिराहा र सप्तरीमा तीनवटा विद्यालयहरुलाई ६० थान कम्प्युटर र अन्य सामाग्रीहरु सहयोग गरिएको छ । एशोसिएसन अफ नेप्लिज इन मिडवेस्ट अमेरिका (आन्मा) सँगको सहकार्यमा संचालिन डिट्रोइट म्याराथुन २०२० को अभियान अन्तरगत उक्त सहयोग प्रदान गरिएको हो ।
सिराहा–सप्तर कम्प्युटर ल्याब कार्यक्रम अन्तर्गत सिराहा र सप्तरीका जनता माध्यमिक सुखिपुर, जनता चेथरु जितन माध्यमिक सुखिपुर र राजेन्द्र देवकी माध्यमिक कोइलाडी तिलाठीलाई बीस बीस थान कम्प्युटर, एकएक थान प्रिन्टर र एकएक थान प्रोजेक्टर प्रदान गरिएको छ । जडित सबै कम्प्युटर तथा प्रिन्टरहरुलाई नेटवर्किंगको व्यवस्था पनि गरिएको छ ।
विद्यार्थी, शिक्षक, आन्मा प्रतिनिधी कुन्दन शर्मा मिश्र, स्थानीय समन्वयकर्ता सुरेन्द्र कुमार साह, स्थानीय निकाय तथा बिद्यालय व्यवस्थापन समितिका प्रतिनिधीहरु र स्थानीय जनसमुदायको उपस्थितिमा समाग्री हस्तान्तरण गरिएको हो । अमेरिकाको इन्डियाना बस्दै आएका तेह्रथुम जिल्लाको जलजलेका दाहालले २०२० डिट्रोइट म्याराथुन अन्तर्गत सन् २०२० अक्टोबरमा यो अभियान सुरु गरेका थिए ।
विश्वका विभिन्न नौ वटा देशमा बसोबास गर्दै आएका नेपालीसहितका २३८ जना सहयोगीबाट तेह्र लाख लउनान्सत्तरी हजार तीन सय रुपैयाबाट तीनवटा विद्यालयमा कम्प्युटर ल्याबको निर्माण गरिएको हो । ल्याबको लागि कक्षा कोठा र फर्निचरको व्यवस्था भने बिद्यालयहरु आफैले गरेका छन् ।
विगत पाँच वर्षदेखि हरेक वर्ष म्याराथन दौडदै आएका दाहालले हरेक वर्ष म्याराथन मार्फत विश्वभरका नेपालीहरुको सहयोगमा फण्ड संकलन गरेर नेपालमा स्वास्थ्य र शिक्षाको क्षेत्रमा काम गर्दै आएका छन् ।
सन् २०१६ मा इन्डिन्यापोलिस मोनुमेन्टल म्याराथनमार्फत तेह्रथुममा एम्बुलेन्स, सन् २०१७ मा शिकागो म्याराथनमार्फत नवलपरासीको यादव माध्यमिक बिद्यालयमा छात्रामैत्री शौचालय, सन् २०१८ को मरिन कप्र्स म्याराथन वार्सिटन डिसीमार्फत तेह्रथुमको शंकर र जन ज्योति माध्यमिक बिद्यालयहरूमा कम्प्युटर ल्याबको व्यवस्था गरिएको थियो । सन् २०१९ को न्युयोर्क म्याराथनमार्फत जाजरकोटका ४ वटा विद्यालयहरुमा कम्प्युटर ल्यावको व्यवस्था गरिएको थियो ।
