सरकारी तथ्यांकमा न्युयोर्क सिटीमा नेपाली : कुल जनसंख्या झण्डै ७ हजार, २२ प्रतिशत कागजपत्रविहिन


प्रकाशित मिति : असार १३, २०७८ आईतबार

न्युयोर्क सिटीको मेयर अफिसको आप्रवासी मामिलाले न्युयोर्क सिटीमा रहेका नेपालीहरुको विभिन्न विवरणहरु सार्वजनिक गरेको छ ।

कुल जनसंख्या ६ हजार ८ सय ३८

जस अनुशार न्युयोर्कमा ६ हजार ८ सय ३८ जना नेपाली मूलका आप्रवासीहरु रहेको तथ्यांक सार्वजनिक गरेको छ । सन् २०१० को जनगणनाले न्युयोर्क सिटीमा जम्मा ५ हजार ६ सय ८१ जना नेपाली मूलका व्यक्ति रहेको देखाएकोमा झण्डै १२ बर्षपछि न्युयोर्क सिटीको सरकारी तथ्यांकमा यो संख्या अत्यन्तै कममात्र बढेको देखाइएको छ ।

सन् २०१० को जनगणनामा न्युयोर्कमा रहेका नेपालीहरु ठूलोसंख्यामा गणना हुनबाट छुटेका थिए । त्यस्तै सन् २०१९ को तथ्यांकलाई आधार बनाएर न्युयोर्क सिटीमा नेपाली मूलका व्यक्ति ६ हजार ८ सय ३८ जना अर्थात् कुल जनसंख्याको शुन्य दशमलव ८ प्रतिशतमात्र रहेको देखाएको छ ।

न्युयोर्क सिटीमा एसियन र प्यासेफिक आइल्याण्डर आप्रवासीहरुमा सबैभन्दा धेरै चाइनिज ४ लाख १८ हजार, दोश्रोमा भारतीय १ लाख ५२ हजार, तेश्रोमा कोरियन ५६ हजार, फिलिपिनो ५४ हजार र बंगालादेशी ५३ हजार रहेका छन् । त्यसपछि क्रमश पाकिस्तानी, जापानिज, भियतनामी, ताइवानी र नेपाली रहेका छन् ।

एसियन र प्यासेफिक आइल्याण्डर आप्रवासीहरुमा नेपालीहरु १० औं नम्बरमा रहेका छन् । एसियन र प्यासेफिक आइल्याण्डर आप्रवासीहरुले न्युयोर्क सिटीमा ३० भन्दा धेरै जातीय र ५० भन्दा धेरै भाषागत प्रतिनिधित्व गर्दछन् ।

न्युयोर्क सिटीमा नेपालीको औषत आम्दानी बार्षिक ३६ हजार

न्युयोर्क सिटीमा रहेका नेपालीहरुको औषत आम्दानी बार्षिक ३६ हजार रहेको सरकारी तथ्यांकमा उल्लेख गरिएको छ । एसियन र प्यासेफिक आइल्याण्डर आप्रवासीहरुमा सबैभन्दा धेरै बार्षिक आम्दानी जापानिजहरुको औषतमा ८७ हजार ५ सय रहेको छ ।

औषतमा ३५ बर्षका नेपालीहरु न्युयोर्कमा

न्युयोर्क सिटीमा एसियन र प्यासेफिक आइल्याण्डर आप्रवासीहरु औषतमा ४७ बर्षका रहेका छन् । तर नेपालीहरु भने न्युयोर्क सिटीमा औषतमा ३५ बर्षका रहेका छन् । सबैभन्दा कम उमेरका आप्रवासीहरुमा सबैभन्दा धेरै नेपालीहरु रहेका छन् भने सबैभन्दा बढी उमेरकाहरुमा फिलिपिनोहरु औषतमा ५० बर्षका रहेका छन् ।

स्वास्थ्य विमा नभएका नेपाली १७ प्रतिशत

सबैभन्दा धेरै स्वास्थ्य विमा नभएका एसियन र प्यासेफिक आइल्याण्डर आप्रवासीहरुमा नेपालीहरुको प्रतिशत सबैभन्दा धेरै रहेको छ । स्वास्थ्य विमा नभएका नेपाली आप्रवासीहरु झण्डै १७ प्रतिशत रहेका छन् । जबकी स्वास्थ्यविमा नभएका भियतनामीहरुको संख्या झण्डै ५ प्रतिशतमात्र रहेको छ । औषतमा न्युयोर्क सिटीमा रहेका आप्रवासीहरुमा झण्डै १३ प्रतिशतको स्वास्थ्य विमा छैन ।

नेपालीहरुमध्ये  श्रमशक्ति ७४ प्रतिशत

न्युयोर्क सिटीमा रहेका कूल नेपालीहरुमध्ये कामगर्न सक्ने श्रमशक्तिका रुपमा रहेका नेपालीहरुको प्रतिशत ७४ प्रतिशत रहेको छ । अर्थात् न्युयोर्क सिटीभित्र रहेका अधिकांश नेपालीहरु श्रमशक्तिका रुपमा रहेका छन् । प्रतिशतका हिसाबले सबैभन्दा धेरै श्रमशक्तिमा रहनेमा नेपाली आप्रवासी समुदायभित्र रहेका छन् । न्युयोर्क सिटीमा रहेका एसियन र प्यासेफिक आइल्याण्डर आप्रवासीहरुमा ६३ प्रतिशत र कुल आप्रवासीमा ६५ प्रतिशत श्रम शक्तिका रुपमा रहेका छन् ।

स्वरोजगारमा रहेका नेपालीहरु १६ प्रतिशत

न्युयोर्क सिटीमा स्वरोजगारमा रहेका नेपालीहरु कुल नेपालीहरुको संख्याको १६ प्रतिशत रहेका छन् । पाकिस्तानीहरु २५ प्रतिशत स्वरोजगारमा छन् भने जापानी र बंगालादेशीहरु प्नि १६ प्रतिशत स्वरोजगारमा छन् । न्युयोर्क सिटीमा रहेका कुल एसियन र प्यासेफिक आइल्याण्डर आप्रवासीहरुमा ११ प्रतिशत व्यवसाय संचालकहरु रहेका छन् ।

४३ प्रतिशत नेपालीहरु बिक्रि र सेवाका क्षेत्रमा

न्युयोर्क सिटीमा रहेका नेपालीहरुमध्ये ४३ प्रतिशत नेपालीहरु बिक्रि र सेवाका क्षेत्रमा काम गर्छन् । जसमा ग्रोसरी स्टोर, रेष्टुरेण्ट लगायतका क्षेत्रका काम पर्छन् । बंगालादेशीहरु ४३ प्रतिशत नै यो पेशामा रहेका छन् ।

पाकिस्तानी, नेपाली र बंगालादेशीहरु प्रायजसो उत्पादन, यातायात, सामाग्री ओसारपसार लगायतका पेशामा रहेका छन् । कुल नेपालीहरुमध्ये २३ प्रतिशत यस्ता पेशामा रहेका छन् । पाकिस्तानीहरु ३० प्रतिशत र बंगालादेशीहरु २२ प्रतिशत रहेका छन् । जसभित्र पनि ट्याक्सी र उबर चालकहरु ८० प्रतिशत रहेका छन् ।

नेपालीहरुमध्ये १६ प्रतिशतकोमात्र आफ्नै घर

एसियन र प्यासेफिक आइल्याण्डर कुल आप्रवासीहरुमध्ये ४५ प्रतिशतले आफ्नै घर किनेका छन् । तर नेपालीहरुभने निकै कम रहेका छन् । न्युयोर्क सिटीमा रहेका नेपालीहरुमध्ये १६ प्रतिशतकोमात्र आफ्नै घर रहेको छ भने अरु भाडामा बस्छन् । आफ्नै घर हुने जापानी, पाकिस्तानी, बंगालादेशी र कोरियन पनि कम रहेका छन् ।

नेपालीहरुको बाक्लो बसोबास रहेको क्षेत्र ज्याक्सनहाइट

नेपालीहरुको बसाईको इतिहास औषतमा ९ बर्ष

अन्य आप्रवासीहरुको तुलनामा नेपाली आप्रवासीहरुको न्युयोर्क सिटी बसाईको इतिहास त्यती लामो छैन । औषतमा एसियन र प्यासेफिक आइल्याण्डर आप्रवासीको अमेकिरामा बसाई १९ बर्ष र अन्य आप्रवासीहरुको २२ बर्ष हुँदा नेपालीहरुको जम्मा ९ बर्ष रहेको छ । बंगालादेशीको १३ बर्ष र पाकिस्तानीको १५ बर्ष रहेको छ । पछिल्लो केहीबर्षमा अमेरिकामा आउने नेपालीहरुको संख्या उल्लेख्य रुपमा बृद्धि भएको हो ।

कुल नेपालीहरुमध्ये २२ प्रतिशत कागजपत्रविहिन

न्युयोर्क सिटीमा रहेका कुल नेपालीहरुमध्ये २२ प्रतिशत कागजपत्रविहिन रहेको तथ्यांकमा देखिएको छ । एसियन र प्यासेफिक आइल्याण्डर कुल आप्रवासीहरुमध्ये १३ प्रतिशत कागजपत्रविहिन रहेकोमा नेपालीहरुको दर औषतभन्दा बढी रहेको छ । न्युयोर्क सिटीमा कुल आप्रवासीहरुमध्ये १६ प्रतिशत कागजपत्रविहिन रहेको तथ्यांक रहेको छ ।

अमेरिकी नागरिकता लिएकाहरु २९ प्रतिशत

त्यस्तै न्युयोर्क सिटीमा रहेका नेपालीहरुमध्ये अमेरिकी नागरिकता लिएकाहरु २९ प्रतिशत रहेको तथ्यांकमा उल्लेख छ । भियतनामीमा यो प्रतिशत ७४ रहेको छ भने फिलिपिनोमा ६५ प्रतिशत रहेको छ । अन्य व्यक्ति नागरिकताका लागि योग्य नभएको वा लिन नचाहेका उल्लेख गरिएको छ ।

कुल नेपालीहरुमध्ये ३८ प्रतिशत नेपालीहरु अरु परिवारसँग मिसिएर बस्ने

अरु परिवारसँग न्युयोर्क सिटीमा मिसिएर बस्नेमा पनि नेपालीहरु सबैभन्दा धेरै रहेका छन् । कुल नेपालीहरुमध्ये ३८ प्रतिशत नेपालीहरु अरु परिवारसँग मिसिएर बसेका छन् । कुल न्युयोर्करहरुमा जम्मा १२ प्रतिशतमात्र अरु परिवारसँग मिसिएर बस्दै आएका छन् । बंगालादेशीहरुमा अरु परिवारसँग मिसिएर बस्नेहरु २१ प्रतिशत छन् ।

 

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com