जुलाई भिसा बुलेटिन: अमेरिकी नागरिकका २१ बर्ष नाघेका छोराछोरीलाई ग्रिनकार्ड पाउन ६ बर्ष ९ महिना
प्रकाशित मिति : असार ४, २०७८ शुक्रबार
अमेरिकी सरकारको विदेश मन्त्रालय ब्यूरो अफ कन्सुलर अफेयर्सले जुलाई महिनाको भिसा बुलेटिन जारी गरेको छ । जसमा विभिन्न श्रेणीमा ग्रिनकार्ड पाउन लाग्ने अवधि र ग्रिनकार्ड फाइल गर्न पाउने मिति उल्लेख गरिएको छ ।
ग्रिनकार्ड फाइल गर्ने व्यक्ति अमेरिकामा नै रहेको खण्डमा प्राथमिकता मितिका आधारमा स्टाटस एड्जस्टका लागि आई ४८५ फाइल गर्न सक्छन् । अमेरिकाबाहिर हुनेहरुका सन्दर्भमा भिसा बुलेटिनका आधारमा आफ्नो ग्रिनकार्डका लागि लाग्ने अवधि थाहा पाउन सक्छन् ।
जुलाईको भिसा बुलेटिन अनुशार अमेरिकन नागरिकका २१ बर्षमाथिका अविवाहित छोराछोरीहरुका लागि ग्रिनकार्ड पाउन लाग्ने अवधि अहिले झण्डै ६ बर्ष ९ महिना रहेको छ । अर्थात् यो श्रेणीमा नोभेम्बर १५, २०१४ भन्दा अगाडि आवेदन दिएकाहरुले जुलाई महिनामा ग्रिनकार्ड पाउन सक्नेछन् ।
तर अमेरिकाभित्रै रहेको खण्डमा १५ मे २०१६ भन्दा अगाडि आई १३० आवेदन दिएकाहरुले जुलाईमा ग्रिनकार्ड आवेदन आई ४८५ फाइल गर्न सक्छन् । जुनको भिसा बुलेटिनको तुलनामा यो अवधि झण्डै साढे २ महिना घटेको छ ।
भिसा बुलेटिन: सबै डिभी विजेताको भिसा करेन्ट, अमेरिकामा हुनेले एड्जस्ट गर्नसक्ने, बाहिर हुने अन्यौलमा
त्यस्तै ग्रिनकार्डबाहकका दम्पत्ति र २१ बर्ष ननाघेका छोराछोरीहरुका लागि जुलाई महिनामा पनि भिसा करेन्ट रहेको छ । अमेरिकामा हुनेहरुले आई १३० आवेदनका साथमा ग्रिनकार्ड आवेदन आई ४८५ फाइल गर्न जुनमा पनि प्रतिक्षा गर्नुपर्दैन, एकसाथ फाइल गर्न सक्छन् । अमेरिकाबाहिर हुनेहरुको सन्दर्भमा नेशनल भिसा सेन्टरले भिसाको प्रतिक्षा नगरी सरासर प्रकृया अगाडि बढाउँछ ।
२१ बर्ष नाघेका छोराछोरी, विवाहित छोराछोरी र दाजुभाई दिदीबहिनीलाई ग्रिनकार्ड पाउन ६ देखि १५ बर्ष
कोरोनाको महामारी कारण कैयन अमेरिकी दूतावास र कन्सुलेटहरु बन्द वा सिमित क्षमतामा संचालन भइरहेकाले भिसा करेन्ट भइसकेका आवेदकलाई पनि भिसा जारी गर्नमा ढिलाई भइरहेको छ । विभिन्न श्रेणीमा भिसा करेन्ट भइसकेकाहरु दूतावासमा अन्तरवार्ता अप्वाइन्टमेन्टको प्रतिक्षामा रहेका छन् ।
दूतावासहरुले विभिन्न प्राथमिकताका आधारमा भिसा जारी गरिरहेका छन् । जसमा अमेरिकी नागरिकका परिवारको भिसालाई उच्च प्राथमिकता दिइएको छ ।