कोरोना महामारी : नेपालमा सक्रिय संक्रमितको संख्या १ लाख नाघ्यो
प्रकाशित मिति : बैशाख २९, २०७८ बुधबार
पछिल्लो २४ घण्टामा नेपालमा नौ हजार ३०५ संक्रमित थपिएका छन्। योसँगै नेपालमा सक्रिय कोरोनाका बिरामी एक लाख एक हजार ६३४ पुगेका छन् । पहिलो पटक नेपालमा सक्रिय संक्रमितको संख्या एक लाख नाघेको हो।
स्वास्थ्य मन्त्रालयका अनुसार २० हजार ३६२ जनाको पिसिआर र ४२४ जनाको एण्टिजेन परीक्षणमा नौ हजार ३०५ जनामा संक्रमण पुष्टि भएको हो। यसमध्ये पिसिआरबाट नौ हजार २३८ र एन्टिजेन विधिको परीक्षणका क्रममा ६७ जनामा संक्रमण पुष्टि भएको जनाइएको छ।
सबैभन्दा बढी काठमाडौँमा तीन हजार २५० जनामा संक्रमण पुष्टि भएको छ। ललितपुरमा ४४८ र भक्तपुरमा २२६ जनामा संक्रमण पुष्टि भएको छ। काठमाडौँ उपत्यकामा २४ घण्टामा कूल तीन हजार ९२४ जनामा संक्रमण पुष्टि भएको हो। यसैगरी बढी संक्रमण पुष्टि भएका जिल्लामध्ये रूपन्देहीमा ७७१, कैलालीमा ३३९, मोरङमा ३३६, झापामा ३००, बाँकेमा २८७, दाङमा २७७, कास्कीमा २३५ जना कोरोना सङ्क्रमित पछिल्लो २४ घण्टामा थपिएका छन् ।
नेपाली सेनाद्वारा गरिएको शव व्यवस्थापनको तथ्याङ्कका आधारमा कोभिड १९ संक्रमणबाट गत २४ घण्टामा १६८ जनाको मृत्यु भएको छ । हालसम्म कोरोना संक्रमणबाट मृत्यु हुनेको संख्या चार हजार २५२ पुगेको छ। यस अवधिमा चार हजार ४४४ जना कोरोना भाइरसको संक्रमणबाट मुक्त भएको मन्त्रालयले जनाएको छ। हालसम्म तीन लाख १६ हजार ४६८ जना संक्रमणमुक्त भएका छन्। यो कुल संक्रमितको ७४.९ प्रतिशत हो ।
सक्रिय संक्रमितमध्ये काठमाडौँ उपत्यकाका तीन जिल्लामा सर्वाधिक संख्या छ। हालसम्म कोरोना भाइरसबाट संक्रमितको संख्या चार लाख २२ हजार ४१६ पुगेको छ। सक्रिय कोभिड १९ संक्रमितमध्ये एक लाख एक हजार ६३४ जना आइसोलेसनमा छन् । जसमध्ये एक हजार २४१ को आइसीयूमा उपचार भइरहेको छ । भेन्टिलेटरमा राखेर २८५ जनाको उपचार भइरहेको मन्त्रालयले जनाएको छ।