गण्डकी प्रदेशको मुख्यमन्त्रीमा पृथ्वीसुब्बा गुरुङ पुनः नियुक्त
प्रकाशित मिति : बैशाख २९, २०७८ बुधबार
गण्डकी प्रदेशको मुख्यमन्त्रीमा पृथ्वीसुब्बा गुरुङ पुनः नियुक्त भएका छन्। नेकपा एमाले संसदीय दलका नेता गुरुङले बुधबार नै सपथ लिने भएका छन्।
अल्पमतमा परेपछि गुरुङले वैशाख २६ गते पदबाट राजीनामा दिएका थिए। त्यससँगै गण्डकीकाे सरकारसमेत काम चलाउ बनेको थियो ।
गुरुङकाे राजीनामा पछि प्रदेश प्रमुखले दलहरुलाई बुधबारसम्मकाे समय दिँदै नयाँ सरकार गठनका लागि आह्वान गरेकी थिइन् ।
विपक्षी दलहरु कांग्रेस, माओवादी, जसपालगायत मिलेर कांग्रेसका कृष्णचन्द्र नेपाली पोखरेललाई मुख्यमन्त्रीमा अगाडि बढाए पनि बहुमत पुर्याउन सकेका थिएनन्। त्यसपछि संविधानको धारा १६८ (३) अनुसार प्रदेश सभाको सबैभन्दा ठूलो दलको संसदीय दलको नेताको रुपमा गुरुङ नै मुख्यमन्त्री नियुक्त भएका हुन्।
अब गुरुङले ३० दिनभित्र प्रदेश सभाबाट विश्वासको मत लिनुपर्छ।
अपडेट:
गण्डकी प्रदेशको मुख्यमन्त्रीमा पुनः नियुक्त भएका पृथ्वी सुब्बा गुरुङले पद तथा गोपनीयताको सपथ लिएका छन्। उनलाई बुधबार साँझ प्रदेश प्रमुख सीता पौडेलले सपथ गराएकी हुन्।
यसअघि प्रदेशसभामा सबैभन्दा ठूलो दलका नेताको हैसियतमा गुरुङ मुख्यमन्त्रीमा नियुक्त भएका थिए।