नेपालमा अन्तर्राष्ट्रिय उडान स्थगन मे ३१ सम्म थप
प्रकाशित मिति : बैशाख २८, २०७८ मंगलबार
नेपालको नागरिक उड्ययन प्राधिकरणले नेपालमा अन्तर्राष्ट्रिय उडान स्थगन मे ३१ सम्म थप गरेको छ । यसअगाडि मे ६ को मध्यराती १२ बजेदेखि लागु भएको अन्तर्राष्ट्रिय उडान स्थगन मे १४ सम्म जारी रहेकोमा आज नागरिक उड्ययन प्राधिकरणले सुचना जारी गरी मे ३१ सम्मका लागि स्थगन थप गरेको हो ।
विश्वभर फैलदै गएको कोरोनाको नयाँ भेरियन्टको संक्रमण नेपालमा पनि बढ्दै गएको सन्दर्भमा उपत्यकामा लकडाउनको अवधि बढाएसँगै अन्तर्राष्ट्रिय उडान स्थगनको अवधि पनि बढाइएको हो ।
एयर बबल सहमति अनुरुप नेपाल र भारतबीच सातामा हुने दुईवटा उडानहरु भने कायमै रहनेछन् । जसमध्ये एउटा उडान नेपाल एयरलाइन्सको र अर्को उडान एयर इन्डियाको हुनेछ । अन्य उडानका सन्दर्भमा प्राधिकरणले एयरलाइन्सहरुलाई टिकट बुकिङ खुला नगर्न सुचित गरेको छ ।
अन्तर्राष्ट्रिय चार्टड र उद्दार उडानका हकमा स्वास्थ्य सुरक्षा मापदण्डको पूर्ण पालना हुनेगरी संस्कृति, पर्यटन तथा नागरिक उड्ययन मन्त्रालयले उडान अनुमति जारी गरिरहेको छ । त्यस्तै कार्गो उडानका सन्दर्भमा पनि दैनिक अनुमति प्रदान गरिदै आएको छ । जस अन्तरगत मे १२ मा हिमालयन एयरलाइन्स, शिचुवान एयरलाइन्स र एयर चाइनका कुल ४ वटा कार्गो उडानहरु हुनेछन् ।
चार्टड र उद्दार उडानमार्फत आउने यात्रुले सरकारले तोकेका होटेलमा आफ्नै खर्चमा अनिवार्य १० दिन क्वारेन्टीनमा बस्नुपर्नेछ । एयरलाइन्सले कुनै यात्रु कोरोना पोजेटिभ भएको बोकेको पाइएमा विमानमा चढेका सबै यात्रुको क्वारेन्टीन खर्च एयरलाइन्सले नै बेहोर्नुपर्नेछ ।
चार्टड र उद्दार उडानबाट आवतजावत गर्नेहरुलाई बारकोड र फोटोसहितको पीसीआर रिपोर्ट समेत अनिवार्य गरिएको छ । त्रिभुवन अन्तरराष्ट्रिय विमानस्थलबाट आन्तरिकतर्फ १० हेलिकोप्टरसहित २० तथा अन्तरराष्ट्रियमा तीन नेपालीसहित २० हवाई सेवा प्रदायक कम्पनीले उडान भर्दै आएका छन् ।