नेपालमा थप २२५ कोरोना संक्रमितको मृत्यु, मृतकको संख्या ४ हजार नाघ्यो
प्रकाशित मिति : बैशाख २८, २०७८ मंगलबार
नेपालमा कोरोना संक्रमणबाट थप २ सय २५ जनाको मृत्यु भएको छ। स्वास्थ्य तथा जनसंख्या मन्त्रालयका अनुसार देशभर थप २२५ जना कोरोना संक्रमितको मृत्यु भएको हो।
नेपाली सेनाले विभिन्न मितिमा गरेको कोरोना संक्रमितको शव व्यवस्थापनको संख्यालाई समेत समावेश गरेर मन्त्रालयले विवरण सार्वजनिक गरेको हो। योसँगै नेपालका कोरोना संक्रमणका कारण मृत्यु हुनेको संख्या ४ हजार ८४ पुगेको छ।
यस्तै, पछिल्लो २४ घण्टामा देशभर ९ हजार ४८३ जना संक्रमित थपिएका छन्। नेपालमा हालसम्म सक्रिय संक्रमितको संख्या ९७ हजार ८ पुगेको छ।
यस्तै काठमाडौं उपत्यकामा ३ हजार ९२७ जनामा संक्रमण पुष्टि भएको छ। जसमा सबैभन्दा बढी काठमाडौंका २ हजार ७८८, ललितपुरका ६०२ र भक्तपुरका ५२३ छन्।