७६ (२) बमोजिम सरकार गठन प्रक्रिया सुरु गर्न तीन दलद्वारा राष्ट्रपतिलाई आग्रह
प्रकाशित मिति : बैशाख २७, २०७८ सोमबार
नेपाली कांग्रेस, नेकपा माओवादी केन्द्र र जनता समाजवादी पार्टीले संविधानको धारा ७६ को उपधारा (२) बमोजिम प्रधानमन्त्री नियुक्त गर्ने प्रक्रिया प्रारम्भ गर्न राष्ट्रपतिलाई आव्हान गरेका छन्।
प्रधानमन्त्री केपी ओलीले राखेको विश्वासको मत संसदबाट असफल भएलगत्तै संयुक्त विज्ञप्ति प्रकाशित गर्दै उनीहरुले उक्त आव्हान गरेका हुन्। कांग्रेस सभापति शेरबहादुर देउवा, माओवादी केन्द्र अध्यक्ष पुष्पकमल दाहाल प्रचण्ड र जसपा अध्यक्ष उपेन्द्र यादवले उक्त आव्हान गरेका हुन्।
प्रधानमन्त्री केपी ओलीले नेपालको संविधानको धारा १०० को उपधारा (१) बमोजिम विश्वासको मतका लागि प्रतिनिधिसभा समक्ष राखेको प्रस्ताव संविधानको धारा १०० को उपधारा ३ बमोजिम प्रतिनिधिसभामा तत्काल कायम रहेका सम्पूर्ण सदस्य संख्याको बहुमतबाट पारित हुन नसकेकाले ओली नेपालको संविधानबमोजिम प्रधानमन्त्री पदबाट मुक्त भएको पनि उनीहरुले जनाएका छन्।