नेपालमा कोरोना संक्रमणबाट २४ घण्टामा ८८ जनाको मृत्यु, ८,८५० संक्रमित
प्रकाशित मिति : बैशाख २६, २०७८ आईतबार
पछिल्लो २४ घण्टामा नेपालमा ८ हजार ८५० कोरोना संक्रमित थपिएका छन्। स्वास्थ्य तथा जनसंख्या मन्त्रालयका प्रवक्ता जागेश्वर गौतमका अनुसार १८ हजार ७८७ पिसिआर र ६०० एन्टिजेन परीक्षण गर्दा ८ हजार ८ सय ५० जनामा संक्रमण पुष्टि भएको जानकारी दिए। योसँगै नेपालमा संक्रमितको संख्या ३ लाख ९४ हजार ६६७ पुगेको छ।
संक्रमितमध्ये सबभन्दा धेरै ३० देखि ३९ वर्ष उमेर समूहका दुई हजार ३८ जना छन्। यस्तै संक्रमण निको भई चार हजार २२ जना घर फर्किएका छन्। अहिलेसम्म तीन लाख दुई हजार ७८७ निको भएर घर फर्किएका छन् । नेपालमा निको हुने दर ७६.७ प्रतिशत छ ।
यस्तै संक्रमणबाट ८८ जनाको निधन भएको छ। यो २४ घण्टाकै नयाँ रेकर्ड हो। मन्त्रालयका प्रवक्ता डा गौतमले कोभिड–१९ सङ्कट व्यवस्थापन केन्द्र (सिसिएमी) को तथ्याङ्कमा नेपाली सेनाले शव व्यवस्थापन गरेको आधारमा आइतबार निधन हुनेको सङ्ख्या ८८ पुगेको जानकारी दिए। कोरोनाबाट मृत्यु हुनेको संख्या तीन हजार ७२० पुगेको छ ।
यस्तै पाँच सय बढी सङ्क्रमण भएका जिल्ला २६ पुगेका छन् । प्रवक्ता डा गौतमका अनुसार मोरङ, सुनसरी, झापा, धनुषा, पर्सा, महोत्तरी, काठमाडौँ, ललितपुर, भक्तपुर, चितवन, काभ्रे, मकवानपुर, धादिङ, नुवाकोट, कास्की, गोरखा, दाङ, बाँके, रुपन्देही, पाल्पा, बर्दिया, कपिलवस्तु, सुर्खेत,कैलाली, कञ्चनपुर र वैतडी रहेका छन् ।
आइसियुमा ८३२ र भेन्टिलेरमा २६७
यसैगरी संक्रमितमध्ये ८३२ सघन उपचार कक्ष (आइसियु) र २६७ जना भेन्टिलेटरमा उपचार गराइरहेका छन् । प्रदेश १ मा ११३, प्रदेश २ मा ६०, वाग्मती प्रदेशमा ४४३, गण्डकी ६१, लुम्बिनी ८६, कर्णाली ३३ र सूदुरपश्चिम ३६ आइसियुमा रहेका छन् । यस्तै प्रदेश १ मा १७, प्रदेश २ मा ३७, वाग्मती प्रदेशमा १५७, गण्डकी १३, लुम्बिनी २१, कर्णाली ११ र सूदुरपश्चिम ११ भेन्टिलेटर रहेका छन्।