माओवादीले सरकारलाई दिएको समर्थन फिर्ता लियो, यस्ता छन् आरोप (पूर्णपाठसहित)
प्रकाशित मिति : बैशाख २२, २०७८ बुधबार
नेकपा माओवादी केन्द्रले केपी शर्मा ओली नेतृत्वको नेकपा एमालेको सरकारलाई दिएको समर्थन फिर्ता लिएको बारे संसद सचिवालयलाई जानकारी गराएको छ।
माओवादी केन्द्रका तर्फबाट मुख्य सचेतक देव गुरुङसहितको टोलीले सचिवालय पुगेर समर्थन फिर्ताको पत्र बुझाएको हो। सचिवालयका तर्फबाट प्रतिनिधिसभाका सचिव गोपालनाथ योगीले उनीहरुको पत्र बुझेका थिए। सचिवालयलाई औपचारिक पत्र बुझाएसँगै ओली सरकार अल्पमतमा परेको छ।
‘माओवादी केन्द्र सङ्घीय संसदीय दलको निर्णयअनुसार प्रधानमन्त्री केपी शर्मा ओलीको सरकारलाई दिएको समर्थन आजकै मितिदेखि लागू हुने गरी फिर्ता लिइएको छ’, अध्यक्ष पुष्पकमल दाहाल ‘प्रचण्ड’द्वारा हस्ताक्षरित पत्रमा भनिएको छ।
नेपालको संविधानको धारा ७६ (२) अन्तर्गत प्रधानमन्त्रीका रुपमा नेकपा (एमाले) संसदीय दलका नेता केपी शर्मा ओलीलाई माओवादीले २०७४ फागुनमा समर्थन गरेको थियो। २०७५ जेठमा एमाले र माओवादी केन्द्रबीच एकीकरण भई नेपाल कम्युनिष्ट पार्टी (नेकपा) को एउटै संसदीय दल बनेको थियो। गत फागुन २३ गते सर्वोच्च अदालतको फैसलाबाट दुई पार्टीबीचको एकता भङ्ग भएको थियो । फैसलापछि पार्टी एकता भङ्ग गरेदेखि नै माओवादीले वर्तमान सरकारलाई आफूहरुको समर्थन नरहेको दोहोर्याउँदै आएको भए पनि माओवादीले समर्थन फिर्ता लिने औपचारिक निर्णय गर्न सकेको थिएन।
सरकारलाई दिएको समर्थन फिर्ता लिन माओवादीलाई चर्को दबाब सिर्जना भएको थियो। त्यसबेला माओवादीले तत्काल समर्थन फिर्ता लिँदा मुलुक झन् राजनीतिक र संवैधानिक सङ्कटमा फस्ने भन्दै उचित समय आएपछि निर्णय लिइने प्रस्ट्याउँदै आएको थियो। एमालेसँग १२१ सांसद रहेका छन् । संसदमा बहुमत पुग्न १३७ मत आवश्यक पर्छ ।
