नेपालमा दोश्रो डोजका लागि तत्काल १६ लाख डोज भ्याक्सिन अत्यावश्यक
प्रकाशित मिति : बैशाख २१, २०७८ मंगलबार
नेपालमा कोरोनाबिरुद्धको खोप लगाइदै
नेपालमा आष्ट्राजेनेका भ्याक्सिनको भारतीय उत्पादन कोभिशिल्डको दोश्रो डोजका लागि तत्काल १६ लाख डोज भ्याक्सिन अत्यावश्यक भएको छ । अहिले यो भ्याक्सिनको पहिलो चरणमा पहिलो डोज लगाएकाहरुलाई दोश्रो डोज लगाउने बेला भएको छ भने एकमहिनाभित्र दोश्रो चरणमा पहिलो डोज लगाएकाहरुको समेत पालो आउँदैछ ।
नेपालमा अहिलेसम्म भारतबाट आएको आष्ट्राजेनेका र चीनबाट आएको सिनोफार्म गरी झण्डै २० लाखलाई कोरोनाबिरुद्धको भ्याक्सिन दिइसकिएको छ । त्यसमध्ये पहिलो डोज लगाएका केहीले अप्रिलको अन्तिम साता दोश्रो डोज पनि लगाएका छन् । तर भारत र चीनबाट भ्याक्सिनका थप डोजहरु प्राप्त गर्न नसक्दा भ्याक्सिन वितरण कार्यक्रम नै स्थगित गर्नुपर्ने अवस्था आएको छ ।
सोमबार प्रधानमन्त्री केपी शर्मा ओलीले गरेको सम्बोधनमा छिमेकी देशहरु र अन्तर्राष्ट्रिय समुदायसँग भ्याक्सिनका लागि आग्रह गरेका थिए । प्रधानमन्त्री ओलीले सरकारी अधिकारीहरु चीन र रसियासँग तत्कालै भ्याक्सिनका डोजहरु सुरक्षित गर्नका लागि सम्पर्कमा रहेको समेत बताएका थिए ।
अहिलेसम्म नेपालमा कोरोना संक्रमणका झण्डै साढे तीनलाख केसहरु रेकर्ड भएका छन् भने ३३ सयभन्दा धेरैको मृत्यु भइसकेको छ । पछिल्लो चरणमा भारतमा कोरोनाको महामारी चर्को बनिरहँदा नेपालमा पनि कोरोना संक्रमण हुनेहरुको संख्या डरलाग्दो तरिकाले बढिरहेको छ ।