सरकारलाई दिएको समर्थन फिर्ता लिने माओवादी निर्णय
प्रकाशित मिति : बैशाख २१, २०७८ मंगलबार
नेकपा माओवादी केन्द्रले केपी ओली नेतृत्वको सरकारलाई दिएको समर्थन फिर्ता लिने निर्णय गरेको छ। मंगलबार बसेको स्थायी कमिटी बैठकले सरकारलाई दिएको निर्णय फिर्ता लिने निर्णय गरेको हो। प्रधानमन्त्री केपी ओलीले यही वैशाख २७ गते बस्ने प्रतिनिधिसभाको बैठकमा विश्वासको मत लिँदैछन्।
‘अब सरकारलाई समर्थन फिर्ता लिएको भनेर लिखित रुपमै पत्र काट्ने निर्णय भएको छ,’ बैठकपछि नेता देव गुरुङले भने। वैठकपछि सञ्चारकर्मीसँग कुरा गर्दै प्रवक्ता नारायणकाजी श्रेष्ठले नियमित अधिवेशन बोलाउनुपर्ने बेलामा विश्वासको मत लिन विशेष अधिवेशनको हिसाबले बोलाइएकाले प्रधानमन्त्री ओलीको नियत ठीक नदेखिएको उनले बताए।
‘संविधानको मर्म र परम्पराभन्दा फरक छ, अधिवेशनको वैधानिकताबारे छलफल गर्नुपर्ने हुन्छ,’ उनले भने, ‘‘नियमित अधिवेशन छलेर प्रधानमन्त्रीले विशेष अधिवेशन बोलाउनु अवैधानिक नै हो।’
यसैगरी लुम्बिनीमा गठन गरिएको सरकार अवैधानिक र लोकतान्त्रिक सिद्धान्तविपरीत रहेको माओवादीको ठहर छ। गण्डकी र सुदूरपश्चिम प्रदेश प्रमुखलाई विना कारण पदमुक्त गरिनु स्वेच्छाचारीका साथै निरंकुश प्रवृत्तिको संकेत रहेको प्रवक्ता श्रेष्ठले बताए।
प्रवक्ता श्रेष्ठले वैकल्पिक सरकार गठनका बारेमा अन्य राजनीतिक दलहरूसँग छलफल भइरहेको पनि बताए।