कोरोना रोकथामका लागि सर्वपक्षीय संयन्त्र गठन गर्न माओवादीको माग
प्रकाशित मिति : बैशाख १४, २०७८ मंगलबार
नेकपा माओवादी केन्द्रले कोरोना नियन्त्रणका लागि सर्वपक्षीय संयन्त्र गठन गर्न सरकारसँग माग गरेको छ। मंगलबार बसेको माओवादी स्थायी कमिटी बैठकले उक्त माग गरेको हो।
बैठकपछि प्रवक्ता नारायणकाजी श्रेष्ठले कोरोना रोकथाम र नियन्त्रणका लागि सरकार, राजनीतिक दल, नागरिक समाज, चिकित्सक, सामाजिक संघसंस्थालगायत सबै एकताबद्ध भएर अघि बढ्न अपिल गर्ने निर्णय गरिएको जानकारी दिए।
यसैगरी माओवादीले भारतमा कोरोनाको दोस्रो लहर तीव्र बनेको र नेपालमा सीमाना खुला भएको सन्दर्भमा सीमालाई कडाइपूर्वक नियन्त्रण गर्न र नेपाल प्रवेश गर्नेहरुले अनिवार्य परीक्षणको प्रक्रिया पूरा गर्नैपर्ने गरी कडाइ गर्न सरकारसँग माग गरेको छ।
कोरोना रोकथाम र नियन्त्रण गर्न अस्पतालहरुलाई डेडिकेटेड कोभिड अस्पताल बनाउने प्रक्रिया अगाडि बढाउन, अक्सिजन, भेन्टिलेटर, आइसीयुको व्यवस्था गर्न, आइसोलेसनको व्यवस्था र आवश्यक आवश्यक स्वास्थ्य सामग्रीको व्यवस्था तथा स्वास्थ्यकर्मीलाई काम गर्ने उपयुक्त वातावरण निर्माण गर्न पनि माओवादीले माग गरेको छ।
यस्तै, कोरोना कहरमा मजदुरलाई तत्काल राहत प्याकेज दिन र पार्टी पंक्तिलाई कोभिड रोकथामका लागि लाग्न पनि माओवादी बैठकले आग्रह गरेको छ।