काठमाडौं उपत्यकाको निषेधाज्ञामा के गर्न पाइने, के नपाइने?
प्रकाशित मिति : बैशाख १३, २०७८ सोमबार
काठमाडौं उपत्यकाका तीन वटै जिल्लामा वैशाख १६ गतेदेखि लागू हुनेगरी निषेधाज्ञा जारी भएको छ। तीनवटै जिल्लाका प्रमुख जिल्ला अधिकारीको संयुक्त बैठकले १६ गते विहान ६ बजेदेखि वैशाख २२ गते मध्यराति १२ बजेसम्मका लागि निषेधाज्ञा जारी गर्ने निर्णय गरेको हो।
निषेधाज्ञाको समयमा सभा,सम्मेलन, गोष्ठीलगायत बढी भीडभाड हुने कार्यक्रमलाई प्रतिबन्ध लगाइएको छ। विवाह,ब्रतबन्धका हकमा भने बढीमा १५ जना उपस्थित हुन पाउने छन्।
यस्तै सार्वजनिक र निजी दुवै किसिमका सवारीसाधन बन्द हुनेछन्। अत्यावश्यक सेवाका सवारीसाधन सञ्चालनमा भने प्रतिबन्ध लगाइएको छैन।
खाद्य सामग्रीका पसल बिहान १० बजेसम्म र बेलुका ५ बजेदेखि ७ बजेसम्ममात्र खुला गर्न पाइनेछन्। डिपार्टमेन्ट स्टोरका हकमा ग्रोसरी कक्षमात्र बिहान १० बजदेखि बेलुकी ५ बजेसम्म सञ्चालन गर्न दिइनेछ ।
यस्तै, काठमाडौं उपत्यका प्रवेश गर्ने व्यक्तिहरुले अनिवार्य रुपमा स्थानीय तहले तोकेको क्वारेन्टाइन र होम आइसोलेसनमा बस्नुपर्नेछ।
